Read Car_Nicobarese Salmai 31 Bible Online

Salmai 31 - Car_Nicobarese bible

Salmai 31

¹Ō Mā Tēv, in meh chin hayönglenre: uh chin yēḵ hētu sirōngkūö, ṙānyen chu im lanöökö meh.

²Asītö elnangre in chu; hēṙen yēḵ ṙānyen chu: me-eṅ man yēḵ ihong chu töngëḵ, inyöö-len chu, patī lanaklö chu.

³Pò meh më-eṅ ihong chu, kinlēḵngô chu inrē: lökten ip minë-eny meh yēḵ urēhĕ-kūö chu, hachōkūö chu inrē.

⁴Tūöknyen chu ṙā-ang el öp inhāṅl, ap inhāṅl chu ṙahātö cha nö ulāitö tīre: tön më-eṅ man chūök, töngëḵ chūök chu.

⁵Eltī meh tī chin kētö ngòh ma-alahare: Ō Mā Tēv, ṙānyen chu man më-eṅ ngaich, më-eṅ Tēv kanô-en.

⁶Surīkhen cha chin yip tömi-kūöṙen tö minyôiny, yip tötöl: hayönglenre pöri öich im Mā Tēv.

⁷Ṙāmölōn chin im miṙēlōn meh: pò meh ngaich meuk kanihngen chu; akahalōn tö öp tökunyahaṅvṙen nö ellōn chu.

⁸Ngaich rö-ö më-eṅ löpngökūö chu eltī ngam tökunyahaṅ-elmat: ṙātö röön chu më-eṅ el töpōiti chūökö.

⁹Ō Mā Tēv, aṙē-ĕlōn tö chu, tön el kanihngen chin: lënyi mat chin ngaich tö miṙiv-lōnre, hôṅ, ngih ellōn chu, töng alaha chu inrē.

¹⁰Pòn keuheūt ngih nômö chu nö i miṙivlōn, nuk samyeū-heu chu inrē nö i unhômö: chuhngöre kumlēḵ chū-ö i ötlanöököre, në tangëḵ chu inrē nö hūöinyngö.

¹¹Minṙēngö chin tī yip tökunya-haṅ elmat tö chu, hòṅ, pōilö in yip ranghö chu: pinhë-eṅkūö inrē in yip hol chu; falngöre tö chu yip mameūkö chu.

¹²Vāchiṙen chin sā kupah töt ōtre nö ellōn: sā tö lakuk chin tanīöyö.

¹³Pò chu hang ṙô tömaṙôngö nö hachōichngö minë-eny: keuheūtngöre lā-a pinhë-eṅkūö; vī talöökö tīre cha-a nö kēḵngö ngih nômö chu.

¹⁴Ō Mā Tēv, hayönglenre pöri chū-ö in meh: ngö ṙô chin, Më-eṅ man Tēv chu.

¹⁵Eltī meh nun minë ṙētak chu: ṙānyen chu ṙā-ang eltī yip lā-al chu: ṙā-ang in cha inrē yip mahakihten chu.

¹⁶Yang an yēḵ ngam kūö meh nö i kui ngòh tarik meh: hayöölen chu im hanāngen neūkölōn meh.

¹⁷Ō Mā Tēv, uh chin sirōngkūö; sā chu havëken meh: hök-ngen yip tötlöök nö sirōng-kūö, hökngen cha nö chēv nö el Chūök Kupah.

¹⁸Hökngen nup töminyôiny-aṅ minuh nö un huveū-euṙô: nup töchōchö ṙô nö chökhu-ṙô tö tölöök, nö hol tö inkeūṙö, mināich inrē.

¹⁹Ō yöng ṙôkö ngam lanöökö meh, ngam ṙahāḵtö meh, lumnööṙö yip tö pa-ekūö tö meh: ngam tī meh pòkūö cha yip mahayönglenre nö in meh, nö i kūö vē kūön tarik!

²⁰Hanyatngen chu man min el nyat ngam kūö meh, ṙā-ang i nup tī tarik nö halēnngövah tīre; hayūni yip min tö meh nö el rūkui nö ṙā-ang i nup litāk lamā-alkūö.

²¹Tökôlò an yēḵ ngam Mā Tēv: pò ò nö hameukhömat chu tö ngam pinngangkūö hanāngen neūkölōn ò, nö el ngam töngëḵ elpanam.

²²Ngö ṙô pöri chū-ö tö pinhë-eṅkūöre, Rökiṙen chin ngaich ṙā-ang i mat meh: hang ngam ṙô chu pöri më-eṅ vinë-elkui yē chu vë-ekūö meh.

²³Ō hāngen yin tö ngam Mā Tēv, ṙòkhöre yī-ö töhet ò! Aṅten yip tökô-en an ngam Mā Tēv, pōyen tī inrē nö reushö yip mahakeūlen la-enre.

²⁴Hangë-eṅre hökngen ngam ellōn meh nö un pa-ekūö: ṙòkhöre yī-ö mameūka im Mā Tēv.