Read Car_Nicobarese Salmai 32 Bible Online

Salmai 32 - Car_Nicobarese bible

Salmai 32

¹Tökôlò ön ngòh tö-aṙēlöng tanôichngen: ngòh tö hanyāti tökööl.

²Tökôlò ön ngòh tarik ngòh töt kaheuktuvö tö ngam Mā Tēv nö i tötṙong: öp töt aṅhav-ellōn tö huneū-en tö-tlöök.

³Yē chu hachēvngöre: köiny-ngöre ngaich në tangëḵ chu kūö ṙô chu hūḵa i rô-òtö sakāmö.

⁴Pò ngam kël meh nö langam nö in chu tö sakāmö, hatööm inrē: sā mak tö sikehngö ngatī nup mak i alaha chu nö nyôngö.

⁵Akahngenre chin tököölu in meh, öt hanyāti inrē öp tötrongta tö chu: ngö ṙô chin, Halööknyôre chin min i ngam Mā Tēv tö nup tanôichngenre; ngaich më-eṅ aṙēlö öp tötṙongta aṅ i tökööl chu.

⁶Kūö e lökten yēḵ, ngòh tölöök nö ve-ekūö meh ip ṙētak hē meh kôti: kô-en, hē nup yöng mak min nö taṙēich-löng, öt hō anū-ö min nö sölta nö in ò,

⁷Më-eṅ man chūök chu hanyatlöre; laklen chu man min tö kanihngen: havīlen chu man min tö tinkökö ṙinānyi.

⁸Haköpten meh chin min el öp talöökö lahök meh: halē-nö meh chin tö në matre nö i kui meh.

⁹Uh yin yēḵ höng sā kōra, hēk sā kötta, nup töt īnu tö mikah elmat: nup töng yanöṅtö tö inkāl elvāngre, hanīötkūöre inrē nö ṙanap u, pò u nö öt haröhtöre nö in meh yĕn öt ngatī.

¹⁰Pōyen miṙīvlōn ön ngòh töt-löök: ngòh mahayönglenre pöri nö i ngam Mā Tēv, havīlen ò min miṙēlōn.

¹¹Yī-ö tölöök, ṙamölōn yin yēḵ im Mā Tēv, ha-öiny öi ṙā-mölōn inrē: ṙòkhöre yī-ö töchiplö ellōn, hūḵa öi ṙāmölōn inrē.