Read Car_Nicobarese Salmai 33 Bible Online

Salmai 33 - Car_Nicobarese bible

Salmai 33

¹Ō yī-ö tölöök, ṙāmölōn yin im Mā Tēv: tövai an ngam nöinyö tö yip töchiplö.

²Ha-öinytö tī ngam Mā Tēv aṅtī tö hārp: tiköknyö nöi-nyö ò i nup tösömö inröt ranöng.

³Tiköknyö tufömngöre tinkö-kö in ò: pōitô öi nyamtô hol tö huneū-enre.

⁴Pò ngam ṙô ngam Mā Tēv Tēv nö töchip: ṙòkhöre nup la-en ò nö aṅ i kanô-en.

⁵Hāngenlōn an tö lanöökö inkaha fālen inrē: tööḵlö ön ngih panam tö hanāngen neūkölōn ngam Mā Tēv.

⁶Kūö ṙô ngam Mā Tēv minë halīöngö nö vīlöngö: kūö unhômö ngam elvāng ò minë töpōyen in u.

⁷Hamūlngö minë mak ngam mai anga-aṅ nö holre nö hēngömūlö: ṙātö ngam tö-aṙū anga-aṅ nö patī chūök inlinhangen.

⁸Ṙòkhöre ön yēḵ ngih panam nö pa-ekūö tö ngam Mā Tēv: hökngen yip aṅ ngih panam nö ngāngö alaha tö ò nö söklöre.

⁹Pòn ṙô-òv anga-aṅ, ngaich keuheūten angū-ö: chöngu anga-aṅ, söklöre ngaich a-ngū-ö nö köp.

¹⁰Rööḵngen tī an ngam Mā Tēv, tö inlēnö aṅ i tarik: vītö nup chanöhlōn tarik anga-aṅ nö öt kô-òlkui.

¹¹Köp an nö örheūheu ngam inlēnö aṅ im Mā Tēv: in yip tumkölchap nö ṙòkhöre öp chanöh ellōn Ò.

¹²Tökôlò öp pumnāmö tarik, öp tö Tēvu tö ngam Mā Tēv: yip tarik katöllö ò nö amin ò.

¹³Ngëicha an ngam Mā Tēv nö el halīöngö: meuk vē kūön tarik nö ṙòkhöre.

¹⁴Ṙeū-eung ip chūökre mat an: nö ngëichkö yip aṅkūö ngih panam.

¹⁵Anga-aṅ ngam vamī ellōn tarik nö ṙòkhöre: ngam nga-mëichkö nup vahīṙen cha.

¹⁶Öt lökten i yip kumyungre ön ngòh rācha nö hayöö-kaṙen: öt lökten i tökiröng kumlēḵre ön ngòh tökalēḵ tarik nö ṙānyuvö.

¹⁷Höng tötöl ön ngòh kōra nö inyönglen: öt rēhĕn anga-aṅ nö lökten i kumlēḵre nö hĕng tak ṙahāḵnyi.

¹⁸Yĕh meuk minë mat ngam Mā Tēv nö i kui cha yip töpa-ekūö tö ò: i kui cha yip mameūka nö i miṙēlōn ò;

¹⁹Nö ṙānyö nômö cha ṙā-ang im kinpaha: ha-aṅhaṅ cha inrē hē el inyāchö.

²⁰Im Mā Tēv nun në nômö hī nö höka: anga-aṅ an holṙen hī, lanaklö hī inrē.

²¹Ṙāmö ellōn in min in ò: pò hī hayönglenre im töhet minë-eny ò.

²²Ō Mā Tēv, hökngen ngam miṙēlōn meh yēḵ nö i kui ih: sā ngam maheūṅkkö ih in meh.