Read Car_Nicobarese Salmai 34 Bible Online

Salmai 34 - Car_Nicobarese bible

Salmai 34

¹Örheūheu chin hakôlò ngam Mā Tēv: iṙūhen ap min nöinyö ò nö elvāng chu.

²Im Mā Tēv ön min ngih nômö nö eū-eure: ṙāmölōn min yip töyāchö ellōn nö hāngö e.

³Yĕh, hol chu hapōilö ngam Mā Tēv: hökngen hī inrē hatāilö ngam minë-eny ò öi holre.

⁴Chöh ngam Mā Tēv chin, ngaich sapṙô chu anga-aṅ: ṙānyen chu inrē ṙā-ang i nup pinhe-eṅkūö chu nö ṙòkhöre.

⁵Ngëichken ò cha-a, ngaich höhlöre: ngaich cha-a min nö öt katöngakūö.

⁶Hūḵa ngòh yāich tarik, ngaich hang ṙô ò ngam Mā Tēv: ngaich hayöölen ò nö ṙā-ang i nup kanihngen ò nö ṙòkhöre.

⁷Havīlen cha yip ma-ahānga ngam Mā Tēv: yip töpa-ekūö tö ò, ngaich ṙānyen cha.

⁸Yĕh, kalah kumchik, Ngëicha inrē, tö ngam Mā Tēv nö tölöök: tökôlò öp tarik öp mahayönglenre nö in ò.

⁹Yĕh, pa-ekūö tö ngam Mā Tēv, yī-ö töhet ò: tön rö-ö yip nö hanātuṙen töpa-ekūö tö ò.

¹⁰Hāṅten nun në kun lāyön, kapahare inrē: acha-a pöri yip chamöh ngam Mā Tēv min öt hanātuṙen tö töng löök.

¹¹Ta-ih, yī-ö nyīö, hangihtöre tö ṙô chu: hòṅ haköpten meh chin tö pinhe-eṅkūö tö ngam Mā Tēv.

¹²Tarik yòh öp anga-aṅ töhòṅ nômu: töhāngenlōn inrē tö töṙōl sakāmö, pòn hòṅ meuk tölöök?

¹³Lakngö ngam litākre tö töt-löök: minuh meh inrē nö i huneū-euṅrô tö tötlöök.

¹⁴Kēḵĕngre ṙā-ang im tötlöök, ngaich la-evṙen tö tölöök; chöh lanāmö, ngaich tömrit e.

¹⁵Lā i tölöök nun minë mat ngam Mā Tēv: luvë-akkūö minë el nang ò nö i ṙô cha nö havë-a.

¹⁶Lā-al yip töt löökö la-en an ngam kūö ngam Mā Tēv: rökngen inköpkölōn cha nö ing panam.

¹⁷Hūḵa ngam tölöök, ngaich hang ngam Mā Tēv: ṙānyen cha inrē i nup kanihngen cha nö ṙòkhöre.

¹⁸Röhta an ngam Mā Tēv nö in cha yip töpaṙööyi ellōn: hayöölen cha inrē yip tökô-en nö haṙivlōn tö tököölre.

¹⁹Pōyen kanihngen ön ngòh tölöök: ṙānyen ò pöri ngam Mā Tēv nö ṙā-ang in u nö ṙòkhöre.

²⁰Haköpka nup tangëḵ ò nö ṙòkhöre: öt hĕng hang tö u tö-ohngö.

²¹Fëlngövah tötlöök an min ngam tötlöök: ngaich cha-a min yip tösumrīk tö tölöök nö kôti nö fāluṙen.

²²Ṙānyö nômö vē tarikre an ngam Mā Tēv: ngaich öt hĕng tak tö cha min yip mahayönglenre nö in ò nö asāchiyö.