Read Car_Nicobarese Salmai 35 Bible Online

Salmai 35 - Car_Nicobarese bible

Salmai 35

¹Ō Mā Tēv, lā-al cha, yip tö hòṅ lā-al chu: kilöönö cha yip kumlöönö chu.

²Kēḵ ngam lanaklöre tö ngam kun lanaklö inrē: söklöre holṙen chu.

³Hōknyö ngam vöi inrē, harah-kūö talöökö cha yip lamū-u chu: ngö ṙô tö ngam nômö chu, Chū-ö chin inyöölen meh.

⁴Hökngen cha nö sirōngkūö, kēḵtu inrē nö im minṙēngö yip chamöh ngih nômö chu: hökngen cha nö havanritre, kalūöchöre elkui inrē, yip mahalēnngötīre nö chökhutī tö chu.

⁵Hökngen cha nöng sā uk nëlö nö im kuföt: ahōṙö cha inrē ngam ma-ahānga ngam Mā Tēv.

⁶Hökngen ngam talöökö cha nö sangūla, takeusa inrē: lūḵ-u cha inrē ngam ma-ahānga ngam Mā Tēv.

⁷Pò cha nö öt chööḵnyu nö hayunngö öp inhāṅl chu nö el anūlö: öt chööḵnyu cha-a nö ul anūlö ngih nômö chu.

⁸Hökngen öp finëlngö nö teunghökui ò nö öt akah-tuṙen, hökngen ap inhāṅl inrē öp hayunngö ò, nöng pôten tö ò: hökngen ò nö fuk el finëlngö.

⁹Ṙāmölōn min ngih nômö chu nö im Mā Tēv: ha-öiny ṙanāmölōnre an min im inyöölen aṅ in ò.

¹⁰Ṙòkhöre ṙô min në tangëḵ chu nö ngö; Mā Tēv, achīö ap tösā meh, öp ṙamānyö yāich nö ṙā-ang in ò ngam tömötlö kumlēḵ tö ò: hôṅ, ngam yāich tö ngam töhāṅ-ten inrē, nö ṙā-ang in ò ngam kamīlan?

¹¹Chōholre yip töt chiplö mameuk: hatönö chu yin tö nup öt mikahlōn chu.

¹²Reushen chu yin tö tötlöök nö i chūök tölöök: nö miṙivngölōn chu.

¹³Ngaich pöri chū-ö, yē cha nö vahavö, öich hayutlöre tö sāk, hakihtenre chū-ö öich ahik: ngaich havan min ap ṙô chu havë-a nö in chu.

¹⁴Sā inlahenre chū-ö tö ò nö hol chu, hanönglöknyö chu inrē: haṙivlōn chin, sā öp maharam yöngre tö kikānö.

¹⁵Ṙāmölōn pöri cha-a yē chu sökngöre; hamūlöre inrē; hamūlöre yip famël nö lā-al chu, ngaich rö-ö chū-ö akahalōn tö e; tikaichngen chu yin, nö öt ṙākenre.

¹⁶Sā yip maha-āichngen töhet nö i nyinā-aṅ tökiröng: ti-ëāṅt kui kanapre cha-a nö in chu.

¹⁷Mā Tēv, irô-òten öm min höng hatīöna? Kēnyö ngam nômö chu ṙā-ang im finëlngö tö cha, ngam töng hĕng in chu, ṙā-ang im lāyön.

¹⁸El ṙôngö yip tömaṙôngö chin min kētö nöinyö meh: ha-öinyö meh chin min el ṙôngö yip tökalēḵ tarik.

¹⁹Un hökiṙen yip lā-al chu nö sūöchlö ṙanāmölōn re nö in chu: un hökiṙen nö rēhĕn yip tösumrīk tö chu nö hanyich matre nö öt lök-nyu chööḵnyi.

²⁰Tön rö-ö yip nö ṙô tö lanāmö: halēnlö nup ṙô mi-nyôiny pöri cha-a nö lā-al cha yip tölām nö im panam.

²¹Hôṅ, pōiti elvāng yin nö vā-alkūöre nö lā-al chu: ngö ṙô yin, Ā, Ā! Meūkö e in īhö!

²²Ō Mā Tēv, meūkö e man ngaich, uh man yēḵ öt ṙô-òv: Ō Mā, uh man yēḵ marôvat tö chu.

²³Hōklöre man, aṅhen inrē im inkaha fālen im chööḵnyö chu: Tēv chu, Mā chu inrē.

²⁴Ō Mā Tēv, Tēv chu, akah fālen chu sā ngam lanöökö meh, un hökiṙen cha-a nö ṙamngövah chu.

²⁵Un hökiṙen nö ngö ṙô nö ellōnre; Ā, ngaich in teūngen tö e! Un hökiṙen nö ngö ṙô cha-a, Ngaichvahkūö in ngeūkten ò.

²⁶Hökngen cha nö sirōngkūö, kalūöchöre elkui inrē, yip töṙāmölōn nö i chanökö chu: hökngen cha nö hayūtö tö sumrōngkūö, minṙēngö inrē, yip mahapōilöre nö lā-al chu!

²⁷Hökngen cha nö hūḵa tö ṙā-nāmölōnre, ṙāmölōn inrē yip töṙāmölōn tö lanöökö ngam chööḵnyö chu: hôṅ, hök-ngen cha nö iṙūhö ṙô nö nö ngö, Hapōilöng an yēḵ ngam Mā Tēv, ngam töku-chīkölōn nö i kanôlò ngam tarik ò!

²⁸Ngaich ngih litak chu min nö kahòkken ngam lanöökö meh: ngam nöinyö meh inrē irôta sakāmö.