Read Car_Nicobarese Salmai 37 Bible Online

Salmai 37 - Car_Nicobarese bible

Salmai 37

¹Um hakihtenre tökūö tötlöök la-en: um rēhĕn kunyahen in cha yip kamëken ötlanöökö.

²Pò cha min nö ka-eūyen nö köti sā kiyôp: ngaich nyīk-ngö sā nup tö-ayal kun chōn.

³Hayönglenre im Mā Tēv, la-evṙen inrē tö tölöök: iyöng im panam, tömrit kanô-en inrē.

⁴Im Mā Tēv ṙanāmölōn man: ngaich kētö nup havëkö meh min anga-aṅ.

⁵Kētö ngam talöököre im Mā Tēv; hayönglenre in ò: ngaich anga-aṅ min nö hateung tö e.

⁶Ngaich anga-aṅ min nö vī ngam lanöökö meh nö kiröönngöre sā hanātö: sā sakāmö ngam inkaha fālen tö meh.

⁷Chēvtöcheich im Mā Tēv, ha-möiyöre inrē, hökken ò: um hakihtenre tökūö ò ngam tökôlò nö el talöököre, kūö ngam tarik inrē töteungtö tī tö nup tötlöök halēnlöre.

⁸Ṙāngö tanānyöre, ṙāngö lanī-nö inrē: um hakihtenre, tön kū-ötö ngam tölöök la-en an angū-ö.

⁹Pò vē tötlöökö la-en min nö rökiṙen: acha-a pöri yip hamöka nö im Mā Tēv tö amīnu tö panam.

¹⁰Pòn höng rahëichtöreṙen, ngaich öt ōtre min yip töt-löök: hôṅ, pētngen man min ngëichkö chūök ò, ngaich öt ōtre min anga-aṅ.

¹¹Amīnu pöri anga-aṅ tö panam ngam töyāchö ellōn: ngaich kumchikngenre min ip lanā-mö töpōyen.

¹²Vī lāinyngen tīre ön ngòh tötlöök tö ngòh tölöök: ngaich ti-ëāṅt kui kanapre inrē nö in ò.

¹³Hayīöli an min tö ngam Mā: Pòn meuk ngam sakāmö ò anga-aṅ nö yih.

¹⁴Hōknyö sanëtre an ngam töt-löök, sōntö linrenyre inrē: nö hòṅ afukngö ngam yāich, tö ngam töhāṅten inrē, nö fëlngö yip töchiplö el talöökö.

¹⁵Lök el fanöinylö cha nup min fël cha: ohngö min inrē nup linreny cha.

¹⁶Ĕhten öp törahëichyen i ngòh tölöök: tö töpōiyen i yip tötlöök.

¹⁷Pò minë kël ngam tötlöök min nö laköl: ṙapkö ngam tölöök pöri ngam Mā Tēv.

¹⁸Akahalōn an ngam Mā Tēv tö nup sakāmö ngam tö-teung: ngaich nup amin cha min nö töng öreūheu.

¹⁹Öt sirōngkūö yip min ip ṙētak tötlöök: tööḵngen min cha-a hē nup sakāmö inyāchö.

²⁰Lëlngö pöri min yip tötlöök, ngaich yip tökunyahaṅ elmat tö ngam Mā Tēv nö sā nup tö-alahav kūön sīṅp: kā-ai nup min, keuheūt nup min nö i lul.

²¹Haṙūöng ön ngòh tötlöök, ngaich öt haṙënhangen nö hēk: aṙē-ĕlōn pöri ngòh tö-löök, ngaich kē-ĕti.

²²Yip töhakôlöngṙô tö ò, amīnu min tö panam: ngaich acha-a yip töt hakôlöngrô tö ò rökiṙen min.

²³Haköptu nup tinlööken ngam tarik tö ngam Mā Tēv: ngaich kuchiklōn anga-aṅ nö im talöökö ò.

²⁴Pòrô anga-aṅ nö fukngö, öt keuheūttöre min anga-aṅ nö fukngö: pò ngam Mā Tēv nö ṙapken ò nö eltīre.

²⁵Ayal chin misī, ngaich chin töngamuh köiny: ngaich sön öich öt hĕng tak maheuṅk tö tölöök nö ṙā-ai, ötrēhĕn yip kūön ò nö icheūkö nya-aṅkūöre.

²⁶Aṙē-ĕlōn an irô-òtö sakāmö ò, kētö töhaṙūöngö inrē: kôlò inrē yip kūön ò.

²⁷Kē-ĕngre töm tötlöök, ngaich la-evṙen tö tölöök: ngaich örheūheu iyöng.

²⁸Tön hāngenlōn an ngam Mā Tēv tö inkaha fālen, öt ṙāngö yip töhetre inrē; örheūheu yip nö aṅtu: rökiṙen pöri min yip kūön yip tötlöök.

²⁹Amin tö panam yip min tö-löök: ngaich örheūheu nö iyöng in e.

³⁰Ṙô tö mikah ap elvāng ngòh tölöök: ṙô tö inkaha fālen öp litāk ò.

³¹Ellōn ò ap chöngö ngam Tēv: öt hĕng lā röön ò min tö taleūchi.

³²Hatīönkö ngam tölöök ngam tötlöök: ngaich lukkenre nö fëlngen ò.

³³Öt ṙāngen ò min ngam Mā Tēv nö eltī ò: öt rēhĕn min nö sāchatī tö ò yē ò nö kahòkkaṙen.

³⁴Höka im Mā Tēv, haköp ngam talöökö ò inrē, ngaich anga-aṅ min nö hapōilen meh, öm amīnu tö panam: meūkö e man min, yē yip tötlöök nö rökiṙen.

³⁵Meuk vē tötlöök chin nö kiröngö chöngö: ngaich hanyaṅlnyöre nö sā tö-ayal chōn nö el chūökre tumlat.

³⁶Hĕng tak pöri öp lamök umuh, Ngëicha ngaich, hö-öv ngaich anga-aṅ nö umuh: hôṅ, chöhan chū-ö, öt kôti pöri anga-aṅ.

³⁷Mikahngö ngam töteung ta-rik, hatīönkö ngam töchiplö inrē: pòn lanāmö öp manā-ngen ò anga-aṅ tarik.

³⁸Keuheūtngörevah pöri vē tötôichlö fālen nö fëli: röki-ṙen min öp manāngen ngòh tötlöök.

³⁹Aṅ im Mā Tēv pöri öp inyöö-len ngòh tölöök: anga-aṅ an töngëḵ chūök cha hē el kanihngen.

⁴⁰Holṙen cha inrē ngam Mā Tēv, kēḵnyen cha inrē nö ṙā-ang el kanihngen: kēḵnyen cha nö ṙā-ang im tötlöök, ngaich hayööken cha, pò cha nö hanyatlöre nö in ò.