Read Car_Nicobarese Salmai 38 Bible Online

Salmai 38 - Car_Nicobarese bible

Salmai 38

¹Ō Mā Tēv, uh man yēḵ vëken chu im lanīnöre: um rēhĕn chökṙen chu im töṙāich kumnyahlōnre.

²Pò minë chòk meh nö tanhöt kūö nö in chu: ngam kël meh inrē nö taṙamten chu.

³Öt lanöökuṙen ön ngih alaha chu, kūö ngam lanīnö meh: öt rēhĕn minë tangëḵ chu nö haneūheuv kūö në tökööl chu.

⁴Pò në tökööl chu nö ngaich nö el kui chu: sā tö langan kūmö, nö öt kaneūnen tö lumnganre.

⁵Hangeūtu në vah chu, chahū-ui inrē: kūö kumlō-ov chu.

⁶Chök chin, pōihangen inrē öich singôn: hĕng sumkam miṙivlōn chin.

⁷Pò ngam ṙat chu nö tööḵlö tö töhū: öt töt vahavö i alaha chu.

⁸Tayē alaha chin, pōihangṙen paṙòk inrē: ayôṙa chin tökūö öt ṙanëmö ellōnre.

⁹Mā, i kui meh nup lōn chu nö ṙòkhöre: öt nyatngö inrē öp inlöinyö chu tö meh.

¹⁰Tarūka nômö chin, öt kum-lēḵĕv öich ngaich: ngaich an ngam hanātö elmat chu nö ṙāngen chu.

¹¹Sökhaka nö köhngen më hanāngen chu, hol chu inrē, tö ngam invah chu: sökhak më mak alaha chu nö marôvat.

¹²Ṙātö tinngöp chu inrē cha-a vē chamöh ngih nômö chu: chökhuṙô inrē cha-a vē cha-möh chanökhutīre tö chu, sumkāmu nö lōn tö michīl.

¹³Öt hang pöri chū-ö, sā tarik töt hang: sā tarik inrē töt huveū-euṙô öp töt vamā-ainykūöre.

¹⁴Hôṅ, sā öp tarik chin töt-hang: öp töt aṅhav elvāng tö tömileuchngen ṙô.

¹⁵Pò chu in meh meūka, Ō Mā Tēv: sapṙô chu man min, Ō Mā, Tēv chu.

¹⁶Pò chu ngö ṙô, Hòṅ cha, nö öt ṙamngövah chu: yē në röön chu nö taleūchi, ngaich cha-a nö hakeūlenre nö lā-al chu.

¹⁷Lēnen chin sökngöre: iṙūhen an inrē ngam miṙivlōn chu nö i kūö chu.

¹⁸Vënyö nup töṙong chin min inrē: haṙivlōn chin min tö tököölre.

¹⁹Keū pöri vē lā-al chu, kalēḵ inrē: ṙūölöre ṙôken inrē vē samūöcha tösumrīk tö chu.

²⁰Acha-a inrē, yip tö tī tö tötlöök nöī invahal tölöök nö lā-al cha: pò chu tömrit ngam tölöök.

²¹Ō Mā Tēv, uh chin yēḵ ṙā-ayö: uh man yēḵ marôvat tö chu, Ō Tēv chu.

²²Hēṙen Man yēḵ holṙen chu: Ō Mā inyöölen chu.