Read Car_Nicobarese Salmai 40 Bible Online

Salmai 40 - Car_Nicobarese bible

Salmai 40

¹Höka chin hamöiyöre im Mā Tēv: ngaich asītöre anga-aṅ nö in chu, hang ṙô chu inrē.

²Kēḵlen chu anga-aṅ inrē ṙā-ang el öp pinhë-eṅkūö anūlö, ṙā-ang el öp tö-ayëṙa tilin: haröönlö röön chu ngaich anga-aṅ i kui öp ihong, haköpngö kinröönngö chu inrē.

³Chaphöt tufömngöre tinkö-kö anga-aṅ inrē nö elvāng chu, öp nöinyö ngam Tēv hī: maṙôngö min yip mameū-kö e, ngaich pa-ekūö, ngaich hayönglenre min nö im Mā Tēv.

⁴Tökôlò öp tarik öp vamīten ngam Mā Tēv nö inyöṅg-lenre: ngaich ötmikūöṙen tö ngam mahakeūṙöre, ötrēhĕn tö ngam kamānngöre nö i minyôiny.

⁵Ō Mā Tev, Tēv chu, pōyen nup pinngangkūö lā-en tī meh nö ngaich, nup chanöh-lōn meh inrē, lā in ih: öt töṙongtavö nö in meh; yē chu öre vë-eny, kakkö u inrē, ngaich pōyen anū-ö tö tökanṙeūken.

⁶Öt ööire man tö tökētu, tö nya-aṅ inrē tökētu; löpnyö-kūö elnang chu më-eṅ ngaich: öt lōnu man tö tö-föngö tökētu, tökētu inrē kūö tökööl.

⁷Ngaich ngö ṙô chū-ö, Yĕh meuk, yih chin: i mat ap līpöre ap kinūichngö chu.

⁸Ō Tēv chu, ööire chin la-evṙen tö lōn meh: hòṅ, ellōn chu an ngam chöngö meh.

⁹Ahangkö lanöökö chin elṙô-ngö tömaṙôngö: yĕh meuk, öt ma-iṅ ṙôre chin, akahalōn man, Ō Mā Tēv.

¹⁰Rö-ö chin hanyatngö ngam lanöökö meh nö ellōn chu; ngaich chin vë-eny ngam kanô-en meh, inyöölen inrē aṅ in meh: rö-ö chin hayun-ngö ngam hanāngen neūkö-lōn meh kanô-en meh inrē, öich i vē tömaṙôngö.

¹¹Ō Mā Tēv, uh man yēḵ öt kētö ngam mirēlōn re nö in chu: hökngen ngam hanā-ngen neūkölōn meh, tö ngam kanô-en meh inrē nö iṙūhen nö aṅten chu.

¹²Pòn öt kanṙeūken në tötlöök nö havīlen chu, kô-òngvah chin tökūö në tököölre, lökngen chu ötkô môk-lökūöre: pōyen nun tökeūyö kui chu, öt kô ön ngih fa-nöinylö chu.

¹³Ō Mā Tēv, hō man yēḵ ṙānyen chu: Ō Mā Tēv, hēṙen holṙen chu.

¹⁴Hökngen cha nö sirōngkūö, kalūöchöre elkui inrē yip chamöh ngih nômö chu, nö hòṅ fëlngö e: hökngen cha nö havanritre, nö miṙē-ĕyö inrē yip tö ööire tö chanökö chu.

¹⁵Hökngen cha nö uṙeh, tökūö sumrōngkūöre: yip tö ngö ṙô tö chu, Ā, Ā!

¹⁶Hökngen cha yip chamöhö meh nö ṙāmölōn nö in meh: hökngen yip töhāngenlōn tö ngam inyöölen aṅ in meh, nö iṙūhö ṙô nö ngö, Hapōilöng an yēḵ ngam Mā Tēv.

¹⁷Yāich pöri chū-ö, töhāṅten inrē; sön ngam Mā nö fēken chu: më-eṅ man holṙen chu, ṙamānyen chu inrē; Ō Tēv chu, uh man yēḵ ahāṅkenre.