Read Car_Nicobarese Salmai 42 Bible Online

Salmai 42 - Car_Nicobarese bible

Salmai 42

¹Sā ngòh hārt töyal tö töhëm mak: ngatī yanālö ngih nômö chu tö meh Ō Tēv.

²Yal ön ngih nômö chu tö ngam Tēv, ngam tö-aṅ Tēv: ĕhē öich min yih öich meūkö ikūö ngam Tēv?

³Höng nya-aṅkūö chu nun në mak mat chu, tö sakāmö hatööm inrē: yē cha nöng i ṙūhöṙô tö chu nö ngö, Isuh ap Tēv meh?

⁴Anū-ö afēkö chu, ngaich keu-heūtnyö ellōnre chū-ö, tö lökten chu holröön yip töma-ṙôngö, ngaich hachōhöt cha el patī ngam Tēv: holtö ṙanāmölōn ṙôre, holtö nöi-nyö inrē, yip tömaṙôngö nö haköpkö ngam töhet sakā-mö.

⁵Ō më-eṅ nômö chu, kūöyòh öm ūngölōn, Kūöyòh öm ötṙēm lātuhēt in chu? Im Tēv man meūka; tön ṙòngmö löknyuṙô chin Ha-öinyan tö-kūö ngam lanööken i kūö Ò.

⁶Ō Tēv chu, haṙiv öp ellōn chu nö in chu: lökten chin fē-ĕlre tö meh löktökūö öp panam Yôtön, Harmòn inrē, löktö ip Rung Misār inrē.

⁷Havëken höö në tö-aṙū i ṙô nup töpöklö mak: pavtu kui chin tö nup mahūvö meh ël mai inrē.

⁸Sönen min ngam Mā Tēv nö hōten ngam hanāngen neūkölōnre tö sakāmö: ngaich ip hatööm öp tinkö-kö min nö in chu, ap vinë-eṅkūö ngam Tēv nômö chu.

⁹Ngö ṙô chin tö ngam Tēv ihong chu, Kūöyòh öm vaichngö tö chu? Kūöyòh öich höng harīvölōn tökūö inkihtenre tö vē lā-alre?

¹⁰Sākūö fël öp nö i në tangëḵ chu, tī më lā-al chu nö miṙēngen chu: yē cha nö iṙūhöṙô tö chu nö ngö, Isuh ap Tēv meh?

¹¹Ō më-eṅ nômö chu, kūöyòh öm haṙivlōn? Kūöyòh öm ötṙēm latuhēt in chu: Im Tēv man meūka; tön ṙòngmö löknyuṙô chin ha-öinyan tö kūö ngam lanööken i kūö Ò.