Read Car_Nicobarese Salmai 44 Bible Online

Salmai 44 - Car_Nicobarese bible

Salmai 44

¹Ō Tēv, hang nun në elnang ih, vënyu nang in tö yik muvöhngö ih: tö nuk sakāmö cha, hē nuk sakāmö misī.

²Aṅtī tö ngam kël re man misī ahōngö yik pumnāmö tarik, ngaich teūichten cha ël e: hakihten më tarik më-eṅ, ngaich pirātngen cha.

³Pò cha nö öt teūngen töm panam nö aṅtī tö minë fëlre, öt rēhĕn nuk kël cha nö hayöölen cha: tön ngam lahāmö kël meh, ngam takeun kël meh, ngam hanātö ngam arëkūö meh inrē, pò meh öm lā in cha lōn.

⁴Ō Tēv, më-eṅ man Rācha chu: chöngu man yēḵ tö ṙinānyö Yāköp.

⁵Lökten in meh in min kuring tö yip lā-alre: lökten i minë-eny meh in min röönten cha yip chamôhòlre nö lā-al ih.

⁶Pò chu öt hayönglenre im linrenyre: ötrēhĕn ngam fël chu min nö hayöölen chu.

⁷Më-eṅ pöri mahayöölen ih ṙā-ang in yip lā-al ih: ngaich sumrōngngökūö cha yip tö-sumrīk tö ih.

⁸Im Tēv in eū-eure i rôta në sakāmö: ngaich ha-öiny ngam minë-eny ò min ör-heūheu.

⁹Ngaich pöri më-eṅ töngamuh pehngen ih, kētu inrē tö meh i minṙēngö: öt in ih inrē më-eṅ kiyung.

¹⁰Vīten ih më-eṅ ngaich hapungtö ukre tö yip lā-alre: ngaich cha-a yip tösumrīk tö ih nö pôten ih.

¹¹Kē-ĕyö in tö meh sā sīṅp tökā-a: ngaich inrē pirāti i vē pumnāmö tarik.

¹²Inyihngö vē tarikre man nöng öt ṙāyu: ngaich öt ṙūölö kanôlò re tö ṙāi cha.

¹³Minṙēngö in ngaich tö tī meh i vē holre: minôn, nāich-ngen inrē in cha yip mahavīlen ih.

¹⁴Vītu in tö meh ngaich kūöngô vē pumnāmö tarik: kinchinykūöre i vē tarik.

¹⁵I rôta në sakāmö ngam minṙē-ngö chu nö i kūö chu: ngam sinrōngkūö chu inrē nö hanyatten chu.

¹⁶Kūö ṙô ò ngam mumṙēngen chu ngam tötlamëkôre inrē: kūö ngam lā-al chu, ngam mahavahalvah inrē.

¹⁷Ṙòkhöre nun nö teunghö kui ih; hö-ö pöri īhö vaichngö tö meh: hö-ö in rēhĕn michūṙen im kinlēḵngô meh.

¹⁸Öt havanritre an ngam ellōn ih öt rēhĕn në vanāngö ih nö kānngöre töm talöökö meh;

¹⁹Pòrô me-eṅ ngaich pumlāmö ih i chūök chākal: am aṅ el inchōn kahul tö kui ih inrē tö nyat kinpaha.

²⁰Yē ih vaichngö tö minë-eny ngam Tēv ih: hēk yē ih tarāklö këlre i tahëng tēv;

²¹Röh ang ngam Tēv min nö chöhö e? pò ò nö akahalōn tö töhayunka ellōn.

²²Hòṅ, pòkūö meh in fëli irôta në sakāmö: kaheuktu in sā sīṅp töṙatnyu likeun.

²³Ō Mā, hōklöre! Kūöyòh öm höng haṙòh? Chōholre, ui urāḵngen pëheyö tö meh.

²⁴Kūöyòh öm hayunngö kūöre? Ngaich vaichngö tö kanihngen ih, tinṙāmö ih inrē?

²⁵Pò në nômö ih nö yapūtköti nö el tumlat: tanti në aich ih inrē nö el tumlat.

²⁶Chōholre holṙen ih: ṙānyen ih lökten im hanāngen neū-kölōn meh.