Read Car_Nicobarese Salmai 46 Bible Online

Salmai 46 - Car_Nicobarese bible

Salmai 46

¹Innyatlö hī an ngam Tēv, kumlēḵ inrē: tö röhta nö holṙen hē el kanihngen.

²Lökten in min öt pa-ekūö, pòrô ngih panam nö haṙī-ingre: pòrô në rôngö nö kēḵnyu nö ellōn ngam mai;

³Pòrô minë mai umuh nö ṙënu-ṙô nö ëlu inrē: pòrô minë rôngö nö kayīna tökūö mahūvö.

⁴Tahël ap umuh, ṙāmölōn tī ap töhëm mak tö ngam el-panam ngam Tēv: ngam töhet chūök inrūkui ngam Lamātulöng.

⁵Ellōn e an ngam Tēv; öt hanlöinyken an min: holṙen e an min ngam Tēv, nö ka-euilökūö.

⁶Angëḵ min vē tarik, kē-ĕyö minë pūlngö inrē: kaknyö ṙôre min anga-aṅ, ayëṙi ngaich ngih tumlat.

⁷In hī an ngam Mā Tēv yip tömaṙô-ngö: ngam Tēv Yāköp an innyatlö hī.

⁸Ta-ih, ngëichkö në la-en ngam Mā Tēv: ngam töpayāyi tī töng panam.

⁹Vīngen kinyūngö an nö ṙā-angre söl manā-angkūö ngih panam: likölngö linreny an, fangngö nup vöi inrē nö pinyënyi; föngngö nup inröl an nö i kūö tameūyö.

¹⁰Hachēvöre, akaha chu tön chū-ö chin Tēv: hapōilöng chin min in yip pumnāmö tarik, hapōilöng chin min ing panam.

¹¹In hī an ngam Mā Tēv yip tömaṙôngö: ngam Tēv Yā-köp an innyatlö hī.