Read Car_Nicobarese Salmai 48 Bible Online

Salmai 48 - Car_Nicobarese bible

Salmai 48

¹Tökiröng an ngam Mā tēv, töhòṅ tāilö ṙô öi ha-öinyan: el pinnāmen ngam Tēv hī!

²Im töhet rôngö ò vāyö intāilö, ngam ṙanāmölōn në taṙòkhöre panam, ngam Rung Siyòn: lā kapā, ngam el pinnāmen ngam tökiröng Rācha.

³El nup patī rācha an ngam Tēv: ngam chūök innyatlö, nö mikahtökūö tö re.

⁴Yĕh meuk, tö vē rācha nö hamūlöre: hol röön re yin nö lök umuh.

⁵Meūkö e cha-a, ngaich möl nö pingangkūö cha-a: uṙeh cha-a, ngaich pa-ekūö cha-a.

⁶Kichëyöre cha-a nö umuh: chök, sā chanökö kikānö kamyôḵ.

⁷Aṅtī tö ngam kuföt chuhöt më-eṅ min: likukngö nup-chōng aṅ Tarsis.

⁸Sā ahang ih, ngatī maheuṅk īhö elpinnāmen ngam Mā Tēv yip tömaṙôngö, elpinnā-men ngam Tēv hī: haköpngö e an min ngam Tēv nö töng örheūheu.

⁹Ō Tēv, fēken nuk hanāngen neūkölōn meh in: el ngam töhet chūök meh.

¹⁰Sā ngam Minë-eny meh, Ō Tēv, ngatī ngam nöinyö meh söl i manā-angkūö ngih panam: tööḵlö an ngam la-hāmö eltī meh tö lanöökö.

¹¹Ṙāmölōn an yēk ngam rung Siyòn, hökngen yip kikānö kūön Yūta nö ṙāmölōn; kūö ngam inkaha fālen aṅ in meh.

¹²Kiröön i Siyòn, havīṙö e inrē: ve-eny nang nup chūök chamônga umuh.

¹³Halöök tīre yin mikahngö nup rananglö ò, ngëichkö nup patī rācha ò; hòṅ yīö min ve-eny e in yip tumköl-chap mu-unôich.

¹⁴Tön Tēv hī ön ngòh Tēv nö ong örheūheu: söl kinpaha an min nö mahachōkūö hī.