Read Car_Nicobarese Salmai 49 Bible Online

Salmai 49 - Car_Nicobarese bible

Salmai 49

¹Hang ngih yin, ṙòkhöre yī-ö tarik: kētö elnang re, ṙòkhöre yī-ö aṅ në panam.

²Hĕnghöre yāich, mā inrē: holre tö tökôlò, yāich inrē.

³Ṙô tö mikah ön min ngih elvāng chu: nup piṙūtkö ngih ellōn chu min inrē nö aṅ i mikah elmat.

⁴Asītö elnangre chin min i inchō-oṙô: i ṙô öp hārp nup min tökihngen ṙô chu nö hameuknyu.

⁵Kūöyòh öich min pa-ekūö hē nup sakāmö tötlöök: hē ngam tötlöök nö i kulôich-röön chu, nö havīlen chu?

⁶Achā-a yip mahayönglenre nö i kanôlò re: ngaich hakeūṙô re nö i ṙôken nup kanôlò re,

⁷Öt hĕng tak tökô tö cha nö ṙānyö hanöng löknyö re: öt rēhĕn nö kô nö kētö ṙāi ò nö im Tēv.

⁸Pò ngam ṙinānyö ngam nômö ò nö töpōi ṙāi: ngaich nö ngih lökngen nö töng hökiṙen;

⁹Hòṅ ò nö aṅ nö örheūheu: hòṅ ò nö öt chahū-uyö.

¹⁰Pòn meuk vē tarik anga-aṅ tö-akaha nö kapah: ṙong-ngen tö tökulō-ov, tö töt akaha inrē nö kapah, ngaich ṙāngö nup kanôlòre nö lum-nööṙö tahëng.

¹¹Ngö lōn yin nö ellōnre, tö nup patī cha nö töng öt chanūhuvṙen: nup elyöngö cha inrē nö tösöl i tumköl-chap; kaheūkö mine-eny nup taṙeū cha tö mine-eny cha.

¹²Hö-ö pöri ngòh tarik nö köp nö im ineū-euṅre: höng sā nup tökapah an töṙeūla.

¹³Angū-ö an talöökö cha vē töt akaha: ngaich pöri cha-a nö sön nö tömka ṙô tö tarik.

¹⁴Halēniṙen yin nö hĕng kiteūm nö el chūök kupah; yōm cha nö pököre ngam kinpaha: ngaich yip töchiplö min nö hayöngö cha tö peuheū; ngaich ap vanāyö cha min nö nya-aṅkūö ngam chūök kupah, lökngen e min nö öt aṅhavkūö.

¹⁵Ṙānyö ngih nômö chu pöri min ngam Tēv nö ṙā-ang i minhôiṅyö ngam chūök kupah: pòn kē-ĕ chu min anga-aṅ.

¹⁶Un man më-eṅ pa-ekūö yĕn hĕng tak öp tövīlöng nö kôlò: yĕn ṙūhölre ṙôken nup kanôlò ò.

¹⁷Pò ò min nö öt kūmuṙen yē ò nö kapah: öt meutti min inrē ngam kanôlò ò nö in ò.

¹⁸Pòrô anga-aṅ ik sāre nö aṅ nö hakôlò nômö eū-eu më-eṅ inrē tö tarik, yē meh öm kôlò tī tö re.

¹⁹Chuh in yip tumkölchap yik yöngre min anga-aṅ: öt meuk hanātö min cha-a.

²⁰Öp tarik i chūök tö-eū-eu, rö-ö pöri nö akaha elmat: höng sā töṙeūla nup tökapah.