Read Car_Nicobarese Salmai 5 Bible Online

Salmai 5 - Car_Nicobarese bible

Salmai 5

¹Ō Mā Tēv, kētö elnangre i në ṙô chu: ngëichkö nup piṙūtkö chu.

²Hang pineūnyö chu, Rācha chu, Tēv chu inrē: tön vë-ekūö meh chin.

³Ō Mā Tēv, tö peuheū man min hang ṙô chu: ip peuheū chin min halēn nup ṙôre vë-ekūö meh, ngaich hönga.

⁴Pò meh öt Tēv, öm tökuchī-kölōn i ötlanöökö: öt iyöng in meh öp tötlöök.

⁵Öt köp an ngam töyahlö lōn nö i kūö meh: ṙòkhöre surīk-hö man tö töla-evṙen tö tötlöök.

⁶Piyāyi yip tö meh tö minyôiny-aṅ: sa-òkkūö an ngam Mā Tēv tö töyal tö mahām, tö tarik inrē mahachīl.

⁷Yih pöri min chū-ö el ngam patī meh, i ṙôken hanāngen neūkölōn meh: I pinhë-e-kūöre chin salāmö meh kū-ö tö ngam töhet chūök meh.

⁸Ō Mā Tēv, hachō-o chu im lanöökö meh, pò vē tökunya-hāṅ elmat tö chu: halöök ngam talöökö chu nö i kūö chu.

⁹Öt kanô-envö elvāng cha; öt lanöökö nup ellōn cha: anū-lö nup kilööp cha töluvë-akkūö: i litākre ṙô yin nö harōi.

¹⁰Ō Tēv, haköp nup fālen cha; hökngen cha nö fuk el nup tīre inlēnö: kuringngen cha i ṙôken nup tanôichngen cha; tön ahôngen meh yin.

¹¹Hökngen cha pöri nö ṙāmö-lōn nö hayönglenre nö in meh, hökngen cha nö ṙāmö-lōn nö pōitô nö hū-a pò meh laklen cha: hökngen cha inrē yip töhangenlōn tö minë-eny meh nö ṙāmölōn.

¹²Pò meh min hakôlò tölöök: Ō Mā Tēv, havīlen ò man min tö kumchiklōn re nö sā lanaklö.