Read Car_Nicobarese Salmai 55 Bible Online

Salmai 55 - Car_Nicobarese bible

Salmai 55

¹Ō Tēv, kētö elnangre i vinë-eṅkūöre tö chu: um hanyatngöre im ṙô chu vinë-elkui.

²In chu Man, ngaich sapṙô chu: kihngen chin ip ṙô re miṙivlōn, alūhure chin.

³Kūö ṙôktô öp tökunyahaṅ elmat, kūö ëlô öp tötlöök: pò cha nö kavalhökui chu tö ötlanöökö, i inngëṙö cha-a nö hakihten chu.

⁴Chök öp ellōn chu nö lātuhēt, nö pōihangen: ngaich ngam pinhe-eṅkūö tö kinpaha nö fuk kui chu.

⁵Teunghö kui chu öp pinhe-eṅkūö, kinchëyöre inrē: ngaich ngam yöng pinhë-eṅkūö nö pavtökui chu.

⁶Ngö ṙô chū-ö ngaich, sanëò-ku chin öre sā nyö-öṅ: ngaich öre öich marô-òlkūö kiteūngöre, ngaich haneū-heuvö.

⁷Yĕh meuk, ngaich chin öre maṙô-òlkūö atēṙa: ngaich iyöng el nyalnyi öre chū-ö.

⁸Haveuthötre öre chū-ö el in-nyatlöre: ṙā-ang im töchōich tö kalēḵ kuföt.

⁹Ō Mā, piyāingö litāk cha: tön meuk tö chökhu chin tanānyö, inrāinyngö inrē el ngam panam.

¹⁰Havīṙöre yin tö sakāmö ha-tööm inrē, nö i kui minë tananglö: ellōn e öp öt la-nöökö, inchök inrē.

¹¹Ellōn e, öt lanöökö: öt ṙāköre el kanröönö e, tinṙā-mö, inchīlö inrē.

¹²Pòn öt öp tökunyahaṅ elmat mumṙēngen chu; hökngenre chin tö e: öt rēhĕn nö anga-aṅ öp tö sumrīk mahapōilöre nö lā-al chu;

¹³Më-eṅ pöri, tarik töròngta in chu: mahanôlö chu, töha-eh hol chu inrē.

¹⁴Kuchīkô ayā-a halēnöre: hol röön yip tömaṙôngö chuh el patī ngam Tēv.

¹⁵Teungtöre an yēḵ ngam töt akahtuṙen kinpaha nö i kui cha, hökngen cha nö chuh el ngam anūlö nöng aṅ: pò nup öt lanöökö nö el nup chūök cha, nö el ṙôngö cha.

¹⁶Havëkö ngam Tēv pöri chū-ö min: ngaich ngam Mā Tēv min nö hayööken chu.

¹⁷Harap, peuheū, sakāmö inrē, öich ve-eny miṙivlōn re, aka-hare inrē: ngaich hang ṙô chu min Anga-aṅ.

¹⁸Im kumchikṙen An nö ṙānyen chu ṙā-ang i kinyūngö tö yip lāḵlö chu: pòn maṙôngö yip lā-al chu.

¹⁹Hang an min ngam Tēv, sapṙô cha Anga-aṅ yip tököp misī: ngam tarik tötharīk-köre, ngam töt pa-ekūö tö ngam Tēv.

²⁰Kiyānglö këlre nö in cha yip tö lāmta nö in ò: ha-chōichngö ngam kinlēḵngô.

²¹Faṙëcha elvāng an sā ta-öng, kinyūngö pöri, ellōn ò: öt ngëḵ nup ṙô ò tö tavī-i, sön pöri nö sā töhōknyu sanët.

²²Hakeunlö lumngan re man im Mā Tēv, ṙapken meh An min: öt hētu An nö halöngngen tölöök nö kē-ĕyö.

²³Ō Tēv, kēten cha Man min el anūlö pinyāingö: öt ròngti sakāmö ön nö aṅ ngòh töyal tö mahām, ngòh tömichīl inrē; in ò pöri min chū-ö hayönglenre.