Read Car_Nicobarese Salmai 56 Bible Online

Salmai 56 - Car_Nicobarese bible

Salmai 56

¹Ō Tēv, yēḵ, aheūkölōn tö chu; tön hòṅ ngeūkten chu ön ngòh tarik: kilöönö chu an öt hĕnghang sumkam nö hakihten chu.

²Hòṅ ngeūkngen chu vē tö-kunyahaṅ elmat tö chu nö öt hēnghang sumkam, pò cha nö maṙôngö: vē kumlöö-nö chu, hakeūlenre nö lā-al chu.

³Ip hē chu pa-ekūö: hayöng-lenre chū-ö min in Meh.

⁴Im Tēv chin min ha-öiny ngam ṙô Ò: im Tēv chin hayöng-lenre, öt hō chin pa-ekūö; suh kanô-òṅ tarik tö chu?

⁵Hĕng sumkam yin nö löinyngö ṙô chu: ṙòkhöre nup lōn cha tö chu nö mi-i tö chōich.

⁶Hamūlöre yin nö hol re, hanyatngöre yin: mikahngö vanāngö chu yin nö sā cha nö hayun ngih nômö chu.

⁷Öt kô-òngvah aich min tö tī öt lanöökö: Ō Tēv; i lanīnö yĕh kuringtö më tarik.

⁸Vënyö kinvānö chu Man ngaich; asëhöt nup mak mat chu el pilön: röh önu nö i mat līpöre Meh?

⁹Havānörit min ngaich yip tö-kunyahaṅ elmat tö chu, ip sakāmö hē chu havë-a: Aka-halōn chin, pò ngam Tēv nö lā in chu.

¹⁰Im Tēv chin ha-öiny ngam ṙô Ò: im Mā Tēv chin min, ha-öiny ngam ṙô Ò.

¹¹Im Tēv chin hayönglenre: öt hō chin min pa-ekūö tö tī tarik nö in chu.

¹²Ō Tēv, i kui chu nup töchūö-ku kinlēngô: kē-ĕkūö Meh chin tö nöinyö, tökētu.

¹³Pò Meh ṙānyö nômö chu ṙā-ang kinpaha, röh Öm ṙā-nyö në kunröön chu ṙā-ang i sanuktöre: pò chu hōtu lök i kūö ngam Tēv, i yanāngö kūö ngam nômö.