Read Car_Nicobarese Salmai 59 Bible Online

Salmai 59 - Car_Nicobarese bible

Salmai 59

¹Ō Tēv chu, ṙānyen chu ṙā-ang i yip tökunyahaṅelmat tö chu: tumlönglen chu tö yip chamôhòlre nö lā-al chu.

²Ṙānyen chu ṙā-ang i yip töla-evṙen tö tötlöök: hayööken chu, ṙā-ang i yip tö yal tö mahām.

³Yĕh meuk, tön ṙōlhak yin, hayun ngih nômö chu: hamūlöre yin vē tökalēḵ nö holre nö lā-al chu; Ō Mā Tēv, öt kūö chu fāluṙen, öt kūö tökööl chu.

⁴Öt fāluṙen chū-ö, fal cha-a nö halēnöre: chōholre Më-eṅ yēḵ holṙen chu Öm Ngëicha.

⁵Më-eṅ, Ō Mā Tēv yip töma-ṙôngö, Tēv Israĕl, chöhkö vē pumnāmö tarik: Um aṙē-ĕlōn tö yip tötlöökö la-en.

⁶Havan yin tö harap, sā ṙënṙô am cha-a ngaich: kiröön ngaich nö havī el ngam pinnāmen.

⁷Yĕh meuk, tö cha nö löklö elvāngre vanöökö, sanët minë i minuh cha: Achīö ap hamang Ngö ṙô cha-a.

⁸Ō Mā Tēv, hayīölngen cha pöri min Më-eṅ: ṙòkhöre yip min pumnāmö tarik nö aṙē-ĕv tö tī Meh.

⁹Ō kumlēḵ chu, hökken meh chin min: pò ngam Tēv nö tö marô-òl kui nö tanang-lö chu.

¹⁰Urēhĕkūö chu An min ngam Tēv tö-aṙē-ĕlōn tö chu: halöngten chu An ngam Tēv öich meuk lōn re i yip tö kunyahaṅ elmat tö chu.

¹¹Uh yin nö fëli, hôn öt vaich-ngö vē tarik chu: pirātngen cha ip minhôiṅyö Meh, tum-ṙeūten cha inrē, Ō Mā, lanak-lö ih.

¹²Kūö tökööl, elvāng cha, kūö ṙô minuh cha inrē, hökngen cha nö kô-òngvah i inkeūlen cha: ötlinëkô, minyôiny-aṅ inrē.

¹³Keuheūtngen cha im lanīnö meh, keuheūtngen cha nö öt ōtren: mikahtölōn cha tö ngam Tēv nö hayöng nö in Yāköp, söl i manāngen ngih panam.

¹⁴Ngaich hökten cha nö havan tö harap: hökngen cha nö sā ṙënṙô am ngaich havī ngam el pinnāmen.

¹⁵Keuheūt chūökö cha-a min nö kuvankö nya-aṅkūö: hĕng mitööm chā-a ngaich nöng ngöh yĕn öt kô-òngkūö.

¹⁶Tikökngö ngam kumlēḵ Meh pöri min chū-ö, hôṅ, pōitô chin min tikökngö ngam miṙēlōn Meh tö peuheū: pò Meh ha-ëhelen tananglö chu, innyatlö chu ip sakāmö kanihngen.

¹⁷Ō kumlēḵ chu, löö in Meh öp min nöinyö tiköknyö chu: pò ngam Tēv nö tömaṙô-òl kui tananglö chu, ngam Tēv tö-aṙē-ĕlōn tö chu.