Read Car_Nicobarese Salmai 64 Bible Online

Salmai 64 - Car_Nicobarese bible

Salmai 64

¹Ō Tēv, hang ṙô chu, vë-eny miṙivlōnre: laklö nômö chu töm pinhe-eṅkūö, aṅ im tökunyahaṅ elmat.

²Hanyatngen chu Laklen töm tö-ulāika inlēnö, tö yip tö la-evṙen tö ötlanöökö: öich ṙā-ang el ṙôngö yip tötlöök tarik.

³Yip mahakeut litākre nö sā sanët: ngaich sōktökūö chòkre tö töchökhu ṙô.

⁴Pò cha nö hòṅ hayuntö tī re nö lireny ngam tökô-en: öt akahtuṙen tī chā-a nö lirënyan, hö-ö nö pa-ekūö.

⁵Haruhlö alahare cha-a i tötlöök chöönyi: vë-ekūöre chā-a nö ulāi tö tīre nö ṙātö tinngöp; ngö ṙô cha-a, Chiāp min mameūkö u?

⁶Chöh nup tötlöök cha-a, Teūngen in, ngö ṙô cha-a, öi milētṙen chöh: aṙū-uti chanöh ellōn, ön ngòh tarik inrē.

⁷Lirënyö cha pöri min ngam Tēv, nö aṅtī tö chòk: höng löök cha-a min nö nyahaṅvö.

⁸Lökten cha min nö vītu nö kavēköti, lā-al tö litāk re chā-a nöng kahngenre: kichinykūö re min nö ṙòkhöre yip mameūkö cha.

⁹Ngaich ṙòkhöre min tarik nö pa-ekūö; ve-eny cha-a min tö e nö tī ngam Tēv: ngaich akahare cha-a nö akah ngam tī Ò.

¹⁰Ṙāmölōn min yip tölöök nö im Mā Tēv, ngaich hayönglenre min nö in Ò: ṙòkhöre yip töchiplö ellōn min inrē nö eū-eure.