Read Car_Nicobarese Salmai 65 Bible Online

Salmai 65 - Car_Nicobarese bible

Salmai 65

¹Ō Tēv, hökken Meh öp nöinyö Meh nö i Siyòn: hateūngi min nö in Meh öp kinlēḵngô töchūöku.

²Ō Më-eṅ hamang vinë-eṅkūöre: ṙòkhöre yin min vē tarik nö yih nö in Meh.

³Kô-òngvah tī nun në tötlöök tö chu: söichiyö nup tötôichlö fālen ih tö Meh min.

⁴Tökôlò öp tarik öp atöllö Meh, ngaich vītu nö iyöng in Meh: pòn hōtu nö iyöng el nup patī Meh, ngam töhet chūök el ngam patī Meh, tööḵngen in min tö lanöökö el patī Meh, ap töhet chūök el ap tempöl.

⁵Lökten i pinngāngö man min sapṙô ih im lanöökö, Ō Tēv inyööken ih: Më-eṅ Man chūök nyanatlö taṙòkhöre, söl manā-angkūö ngih panam, in cha inrē, yip tömaṙôngö i kui mai.

⁶Lamökten i kumlēḵ re Man haköpngö minë rôngö: tönyëklöng ṙat tö minhôiṅyô.

⁷Tamahngö inyôṙö ṙô në mai: inyôṙö në mahūvö u, tinṙōlen tarik inrē.

⁸Pa-ekūö chā-a inrē, yip mi-iyöng manā-angkūö, tö në tī Meh minkahngö: ṙāmölōn tī më-eṅ tö nuk chanūhu peuheū, harap inrē.

⁹Chöhkö ngih panam Man, ngaich hamākö e, pōyen tī Öm hakôlò e: tööḵlö an ngam tahël ngam Tēv tö mak; meūken yip tö Meh tö sāiny, pò Meh halēn ngam panam.

¹⁰Pōyen tī Man ṙöh minë tömalūöta tumlat, ṙātö minë rôngö Më-eṅ umuh: aṅtītö töpaṙōnga kumṙah Më-eṅ vītö u nö a-yëṙa, hakôlò sanīöpö u Më-eṅ.

¹¹Sumpīövlö ngam samyeūheu Më-eṅ tö lanöökö re: suktö kanôlò ngam el kanröönö Meh.

¹²Suktöre anū-ö i, kui kiyôp el inchōnngö: ngaich minë rung nö vīnngö töṙanāmölōn.

¹³Pököre aṅ kui minë kiyôp; löpngö ël minë achāṙö tö sāiny; pōitô nun nö ṙāmölōn, tikökṙôre nun inrē.