Read Car_Nicobarese Salmai 68 Bible Online

Salmai 68 - Car_Nicobarese bible

Salmai 68

¹Hökngen ngam Tēv yēḵ nö chōholre, hökngen më tökunyahaṅ elmat tö Ò, nö parāti: hökngen cha inrē yip sumrīkhen Ò nö pāngö nö i kūö Ò.

²Sā lul nö changāchi, ngatī ahōngen cha: sā paröm nö ṙöichngö nö i kūö tameūyö, ngatī hökngen tötlöök nö lëlngö nö i kūö ngam Tēv.

³Hökngen ngam tölöök yēḵ nö ṙāmölōn; hökngen cha nö pōi ṙanāmölōn nö i kūö ngam Tēv: hôṅ, hökngen cha nö kuchīkö ṙanāmölōn.

⁴Tikökhökūö ngam Tēv, tiköknyö nöinyö Ò: harunglö talöökö Ò, ngam lamök el tönyalnyi; Yāh ap mine-eny Ò; urēhĕkūö Ò ṙāmölōn.

⁵Yöng kūönyōich, kamhòklökui tafīösi inrē: Tēv nö el ngam, töhet elyöngö re.

⁶Vīten ngam töng hĕngtöṙah An nö iyöng elpatī, kēnyö töhakövö an im kanôlò tī: iyöng ël töngëḵngökūö tumlat pöri ngam töminôṙô.

⁷Ō Tēv, hē Meh kiröönngöre urēhĕkūö më tarik: hē Meh lök el inchōn.

⁸Kayīna ngam panam, suktöre inrē ngam halīöngö nö i kūö ngam Tēv: kayīna më-eṅ inrē Sīnāi i kūö ngam Tēv, ngam Tēv Israĕl.

⁹Ō Tēv, pōyen tī Man tö kumṙah: hangëkö ngam amin re Më-eṅ, yē ò nö cheingö.

¹⁰Iyöng ël e yip tömaṙôngö tarik Meh: Ō Tēv, halēn nup tölööktī re më-eṅ i yāich.

¹¹Kētö ngam ṙô ngam Mā: maṙôngö yip kikānö ma-ahānga.

¹²Pāngö yik kumyunglö yip rācha, pāngö cha-a: ngaich anga-aṅ öp töngöh nö i patī, nö michööḵ nup pôḵ.

¹³Hulalngöre öi min el kinlōngö sīṅp, sā nup sanëòk pumpa tö vinngö alaha tö rupīö: nup rööntö sanëòk ò inrē nö vinngö tö humlum tösā elmat manūlö?

¹⁴Hē ngam Tökeuheūttöre chöngö nö pirātngö rācha nö umuh: ngaich kënngöre nup tacham nö i Salmòn.

¹⁵Rôngö ngam Tēv an ngam rôngö Pāsan: tömarô-òlkui an ngam rôngö Pāsan.

¹⁶Yī-ö tömarô-òlkui rôngö, kūöyòh öi tēk sīṙö re? öi im rôngö, ngam chūök lōn ngam Tēv tö elyöngöre: hôṅ, örheūheu An min ngam Tēv nö iyöng in e.

¹⁷Nët anāi köṅny nup inröl ngam Tēv, köṅny, köṅnyu nup: in u An ngamMā, sā re nö i Siyòn, el töhet chūök.

¹⁸Ngaich man yônlö lātulöng hachōḵ ngam inkövö re man nö haköv; i tarik man teūngen tö raneushöre: hòṅ, in yip tömi-ô inrē, hòṅ ngam Mā Tēv nö iyöng in chu.

¹⁹Tökôlò An ngam Mā, ngam töt hĕnghang sumkam nö keun lumngan hī: ngam Tēv, ngam inyööken hī.

²⁰In hī An ngam Tēv, nö Tēv ṙinānyi: aṅ in YĀVĒ, ngam Mā, ngam ṙinānyi ṙā-ang kinpaha.

²¹Nyahaṅ kui tī An ngam Tēv tö yip tökunyahaṅ elmat tö Ò: kachūka keūyö an ngam chukngöm kui nö sā kumröönngöre nö im fālen re.

²²Ngö ṙô ngam Mā, havanten cha chin min hēk nö ṙā-ang Pāsan; kēlen cha chin min hēk ṙā-ang lātaṙeū tö mai.

²³Hòṅ Meh kasum tö kunröönre i mahām: hòṅ nup litāk nup am meh nö michööḵö tö aṅ i yip tö kunyahaṅ elmat tö Meh.

²⁴Ō Tēv, meuk tī Meh yin nö ngaich: meuk kinröönngö ngam Tēv chu, Rācha chu, nö el ngam töhet chūök.

²⁵Urĕh yip tumkökṙôre, tömörit tö tötinköku ṙô ranöng: ellōn yip ṙālö kikānö yip mumnyam nö pirang.

²⁶Hakôlò ngam Tēv yin in yip tömaṙôngö: ngam Mā yīö, lamöklö in Israĕl.

²⁷Penyamin ap umuh, mahayöngö cha, kūön rācha aṅ Yūta, yip ṙôngö cha inrē: kūön rācha aṅ Sepulòn, kūön rācha aṅ Naftalī.

²⁸Tölṙô ngam kumlēḵ meh An ngam Tēv: Ō Tēv, hangëḵkö ngam tīre Man in ih.

²⁹Pò ngam tempöl Meh i Yērusalem: kumtö raneushö meh min yip rācha.

³⁰Vëkö nup hanchōn el tafūyu, nup töpōyen kōiny nuā yip tarik, hol tö kūönre, rööntökui nup rupīö: pirātngö yip tarik, aṅ tö-ööire nö i kinyūngö.

³¹Ṙā-ang Aikup yip min kūön rācha: kurāten min Iti-opīa nö hateutnyö këlre nö im Tēv.

³²Tikökhökūö ngam Tēv, yī-ö, pūlngö ngam panam tiköknyö nöinyö im Mā.

³³In Ò ngam mi-i uk minë halīöngö, ha-eh misī: yĕh meuk, ṙô-òv an, tö ngam tökalēḵ ṙô.

³⁴Löö im Tēv tī yin tö kumlēḵ: i kui Israĕl nup lanöökö Ò, el taṙul nup kumlēḵ Ò inrē.

³⁵Ō Tēv, pinhe-eṅkūö Man el ap töhet chūök re: ngam Tēv Israĕl, Anga-aṅ kamëtö kumlēḵ minhôiṅyö nö i yip tarik Ò, tökôlò An yēḵ ngam Tēv.