Read Car_Nicobarese Salmai 69 Bible Online

Salmai 69 - Car_Nicobarese bible

Salmai 69

¹Ō Tēv, hayööken chu: tön meuthöt nup mak nö el nômö chu.

²Lōngti chin el tö-aṙū-uti tilin, i chūök törö-ö sanökö: yih chin el tö-aṙū-uti mak, i chūök ngam tinṙēichlö nö pavngökui chu.

³Chei chin tö ṙô re peuiny; nyôp ön ngih kilööp chu nö ngaich: paṙūöyi mat chin ip hē re hökkö ngam Tēv chu.

⁴Pōyen yip tö keūyö elkui chu, yip töt chöönyu nö surīkhen chu: kalēḵ cha-a yip töhòṅ rökngen chu, yip tökunyaha-elmat tö chu, samūöcha; ngaich chū-ö havantö nup töt kahëre.

⁵Ō Tēv, akahalōn Man tö kumlō-ov chu: öt nyatngö nup tökööl chu inrē tö Meh.

⁶Uh yip yēḵ hamökken Meh nö sirōngkūö nö lökngö kūö chu, Ō Mā Tēv, yip tömaṙôngö: un miṙē-ĕyö nö lökngö kūö chu yip chamöhö Meh. Ō Tēv, Israĕl.

⁷Tön pòkūö meh chin öich keun sumrōngkūö: haṙungngökūö chu an ngam sumrōngkūö.

⁸Ngaich chin vītöre aṅ tahëng in yip hanöngkisānöre, aṅ tahëng öich in yip kūön öp yöng re kikānö.

⁹Pò ngam kumlēḵ lōn chu tö ngam patī Meh nö kēnyen chu: ngam minṙēngö tī cha yip mumṙēngen Meh nö fuk kui chu.

¹⁰Hē chu peuiny, ngaich hachök ngih nômö re tö inhikö: angū-ö an minṙēngö chu.

¹¹Hē chu vī sāk nö inyut re: ngaich vītöre öich minnôn cha.

¹²Ṙôten chu chā-a yip amūichhak nö i kūö inkūp: tinkökö mihiyōi chin inrē.

¹³Nup ṙô chu pöri vë-ekūö Meh nöng löö in Meh, Ō Mā Tēv, ip ṙētak töhō-ov: Ō Tēv, i ṙôkö miṙēlōn Meh, sap ṙô chu i kanô-en ngam aṅ in Meh inyööken.

¹⁴Ṙānyen chu ṙā-ang el ngam tilin, uh chin halöngtenvö lōngti: hökngen chu ṙānyuvö ṙā-ang in cha yip tö sumrīk tö chu, ṙā-ang el minë tö aṙū mak inrē.

¹⁵Uich hökiṙen öt kô tö tinṙēichlö ngam mak, un rēhĕn nö hökiṙen ngam tö-aṙū nö ngeūkten chu: un tiköptökūöre inrē ngam anūlö nö i kui chu.

¹⁶Ō Mā, sapṙô chu; tön tölöök an ngam hanāngen neūkölōn Meh: sā ṙôken nup miṙēlōn Meh havöötökūöre in chu.

¹⁷Um hanyatngökūö re tö ngòh kūön re: tön el kanihngen chin, hēṙen sapṙô chu.

¹⁸Haröhtöre im nômö chu, ṙānyen e inrē: havaha chu, tön kumnyah elmat chin.

¹⁹Akahalōn Man tö miṙē-ĕv chu, sumrōngkūö chu inrē, minṙēngö chu inrē: ṙòkhöre yin vē lā-al chu nöng i kūö chu.

²⁰Lakūkötī öp minṙēngö nö ellōn chu; tööḵngen chin tö lumngan: ngëichkö öp tö-aṙē-ĕlōn chin, öt hĕng tak pöri mahaṙamlōn inrē, öt hĕng tak mahaṙamlōn kanôtö kūö chu.

²¹Kē-ĕvkūö chin tö cha tö tö-angūṅöv nö nya-aṅkūö chu: i inṙëhe nômö chu, kē-ĕkūö chu cha-a tö töhikīölhu vain nö òk.

²²Hökngen ap mīs i kūö cha, nö nūöt cha: ngaich hē cha nö i lanāmö, hökngen e nö tinngöp cha.

²³Hökngen nup mat cha nö sanglköti: vīten nup ṙat cha nö iruhen nö kichëyöre.

²⁴Vōknyö öp lanīnöre Man i kui cha: hökngen ap tanānyö Meh nö kô-òl nö in cha.

²⁵Hökngen ap elyöngö cha nö ahātiyö: un hĕngtit tak aṅ nup inrūkui cha.

²⁶Tön öt hakôlò Ò yin ngam töchök tö tī meh: ngaich cha-a nö ve-eny chanökö ò, öp töhanyahka tö meh.

²⁷Ṙūöten öt lanöökö nö i öt lanöökö cha: un höktu cha-a nö yih nö im ötlanöökö Meh.

²⁸Hökngen cha nö sīchiyö nö i mat līpöre nômö: un kūchö nö hol yip tölöök.

²⁹Yāich pöri chū-ö halöinyöre inrē: Ō Tēv, hökngen öp inyööken aṅ i Meh nö asöklen chu lātulöng.

³⁰Ha-öiny ngam Tēv chin min tö tinkökö: hapōilen Ò chin min hol tö nöinyö.

³¹In e min ngam Mā nö ṙāmölōn, mötlö töre nö i kōiny nuā: tö kōiny nuā tö sinrōlu, kinsôsu kunröön inrē.

³²Meūkö e yip töyāchö ellōn, ngaich ṙāmölōn: yī-ö chamöh ngam Tēv, aṅ ap yēḵ ellōn yīö.

³³Pò ngam Mā nö hang ṙô tö-iyāich: mikūöṙen tö tökē-ĕ tö Ò.

³⁴Hökngen ngam halīöngö, tumlat inrē, nö ha-öinyö Ò: minë mai tö nup mahalöinyköre aṅ u.

³⁵Pò ngam Tēv min nö hayööken Siyòn, vīlö nup el pinnāmen Yūtā inrē: in e cha-a min nö iyöng ngaich minööngö cha angū-ö.

³⁶Aminten tö e öp kūön yip kūön ò min: ngaich acha-a yip töhangenlōn tö ngam minë-eny Meh, iyöng el e min.