Read Car_Nicobarese Salmai 71 Bible Online

Salmai 71 - Car_Nicobarese bible

Salmai 71

¹Ō Mā Tēv, in Meh chin hayönglenre: uh chin yēḵ hētu sirōngkūö.

²Ṙānyen chu im lanöökö Meh, kēnyen chu inrē ṙā-ang el kanihngen: asītö elnang re in chu, hayööken chu inrē.

³Ihong Man yēḵ elyöngö chu, chūök chu iṙūhen iyöngtöre: kētö chöngö Man ngaich hayööken chu; pò Meh ihong chu, chūök lanaklö chu inrē.

⁴Ō Tēv chu, kēnyen chu ṙā-ang eltī ngam tötlöök: ṙā-ang eltī ngam töt chiplen, töt milēḵṙen inrē tö tarik.

⁵Ō Mā Tēv, tön Më-eṅ Man maheūṅkkö chu: löktö kūö nyinī-öṅ chu, Më-eṅ inyönglö chu.

⁶Löktökūö el chūök kanūönö chin öich ṙapka tö Meh: Më-eṅ Man kamënyen chu ṙā-ang ellōn öp yöng chu kikānö, hòṅ iṙūöhen öp nöinyö Meh tö chu.

⁷Pinngangkūö tömaṙôngö chin: Më-eṅ pöri töngëḵ innyatlö chu.

⁸Tööḵlö elvāng chin min tö nöinyö Meh: hol tö ngam ineū-euṅ Meh inrē, öt hĕng hang sumkam.

⁹Uh chin yēḵ kavāli ip hē re köiny: uh öich ṙā-ayö yē chu ngaich chūhu kumlēḵ.

¹⁰Pò vē tökunyahaṅ elmat tö chu nö kakken chu: acha-a vē hamöng ngih nômö chu, holre nö halēn lōnre;

¹¹Nö ngö ṙô, ṙā-ayö an tö ngam Tēv: fachūran, kē an; matön öt hĕng tak ṙamānyö.

¹²Ō Tēv, uh Man marôvat tö chu, hēṙen holṙen chu.

¹³Hökngen cha nö sirōngkūö, kā-ayö inrē yip tö kunyahaṅ elmat töng nômö chu: hökngen cha nö kahūmi tö minṙēngö, yip chamöh chanökö chu.

¹⁴Iṙūhen pöri chū-ö meūka: ṙūölöṙô re inrē ha-öinyö Meh.

¹⁵Vënyö lanöökö Meh min ngih elvāng chu, öt hĕng hang sumkam, ngam inyööken tī Meh: pò chu öt akahalōn tö ṙôken u.

¹⁶Yih chin min hol tö kumlēḵ ngam Mā Tēv: kakkö ngam lanöökö Meh chin min, Öm höng Më-eṅ.

¹⁷Ō Tēv, löktö kūö nyinī-öṅ chu Man ngaich haköpten chu ngaich chin vë-eny minë pinngangkūö vahīṙen Meh.

¹⁸Hôṅ, yē chu ngaich köṅny, pakū-uvkui inrē, Ō Tēv, uh chin yēḵ ṙā-ai: hanöng saha chu vënyö kumlēḵ Meh in yip tahëng, tumkölchap ngam kumlēḵ Men, in yip mu-unôichngöre yanihih.

¹⁹Ō Tēv, latulöng an ngam lanöökö Meh inrē; Më-eṅ tökeuheūten tö tökiröng la-en: Ō Tēv, achīö ap tö sā Meh?

²⁰Pōyen hameukti Man tö tökiröng kanihngen ngaich ha-aṅhaṅ ih min hēk: ngaich hēk min kēlen ih ṙā-ang lataṙeū töm tumlat.

²¹Ṙūötö ṙôkö chu: havantöre hēk, haṙamlōn chu.

²²Ha-öinyö Meh chin min inrē i ṙô ranöng, Ō Tēv chu: ngam kanô-en Meh; tiköknyö nöinyö Meh chin i ṙô hārap. Ō Më-eṅ töhet i Israĕl.

²³Ṙāmölōn në minuh chu min yē chu tiköknyö nöinyö Meh: ngam nômö chu inrē, ngam töhavaha tö Meh.

²⁴Öt hĕng hang sumkam ṙô ön ngih litāk chu, nö kakkö lanöökö Meh: pò cha nö ngaich nö sirōngkūö, pò cha nö ngaich nö ötkôlò, yik chamöh chanökö chu.