Read Car_Nicobarese Salmai 72 Bible Online

Salmai 72 - Car_Nicobarese bible

Salmai 72

¹Kētö ngam inkaha aṅ in Meh im rācha, Ō Tēv, ngam lanöökö Meh inrē, im kikōnyö kūön rācha.

²Kahòkken vē tarik Meh anga-aṅ, nö im lanöökö ngam yāich meh inrē nö hol tö inkaha.

³Kumtö lanāmö nun në rôngö min nö i vē tarik: në rung inrē, nö i lanöökö.

⁴Kahòkken vē yāich tarik An min, hayööken vē kūön töiyāich An min: ngaich likölngen cha min nö panyeny yip mahakihten.

⁵I rô-òten ngam tavūöi yin min nö pa-ekūö tö Meh: ane inrē i saha rô-òten ngam chingëṅt, i tumköl chap.

⁶Sā chinhūṅtö kumṙah yanīhi An min nö i kui kiyôp tö kamöpö: sā öp kumṙah ṙamös ngih panam.

⁷Kôlò min yip tölöök ip sakāmö Ò: pōyen min inrē lanāmö: hanöng saha ngam chingëṅt nö öt ōtren.

⁸Minā-av An min inrē, vinngö nö im mai: löktökūö ngam tahël, söl manā-angkūö ngam panam.

⁹Cha-a yip mi-iyöng el tönyalnyi min, sōntöre nö i kūö Ò: kurak el tumlat min yip tökunyahaṅ elmat tö Ò.

¹⁰Kumtö raneushö Ò min yip rācha aṅ Tarsis, aṅ nup kun panam inrē: kētö raneushö min yip rācha aṅ Sīpa, aṅ Sepā inrē.

¹¹Hôṅ, ṙòkhöre yip min rācha nö afukngöre nö i kūö Ò: ṙòkhöre pumnāmö tarik min nö lök la-en Ò.

¹²Pòn ṙānyö yip tö-iyāich min Anga-aṅ: yip pameuinyhökūö Ò; yip yāich inrē töt hōluṙen.

¹³Aṙē-ĕlōn An min tö yāich, tö-iyāich inrē: ngaich hayöölen nômö tö-iyāich min Anga-aṅ.

¹⁴Kēnyö nômö cha An min ṙā-ang im inkihten, chanökhuṙen inrē: tölöök min nup mahām cha nö i kūö Ò.

¹⁵Ngaich aṅ min acha-a; ngaich Anga-aṅ min nö kē-ĕvkūö tö humlum aṅ Sīpa: ngaich tarik min nö vë-ekūö Ò nö iṙūhöṙô; hakôlò Ò min cha-a nö öt hĕnghang sumkam.

¹⁶Tëḵ min nup sāiny nö ing panam, i kui minë rôngö; sā Lepanön nup ṙòng nö kayīna: ngaich yip aṅ el pinnāmen min nö kôlò, sā kiyôp ngam tumlat.

¹⁷Köp min öp minë-eny Ò nö örheūhu; iṙūhen ap minë-eny Ò min sā rô-òten ngam tavūöi; in Ò min vē tarik nö kôlò: töṙāmölōn min Anga-aṅ tö ṙô pumnāmö tarik.

¹⁸Tökôlò An yēḵ ngam Mā Tēv, ngam Tēv Israĕl: ngam töng hĕngtak nö öt tī tö pinngangkūö.

¹⁹Örheūheu inrē yēḵ ngam mine-eny Ò nö kôlò: tööḵlö ön yēḵ ngih panam nö ṙòkhöre tö kanôlò Ò. Āmen. Amen!

²⁰Ngö tölngö nun minë vinë-ekūötēv ṙô Tāvit, ngam kikōnyö kūön Yēsī.