Read Car_Nicobarese Salmai 73 Bible Online

Salmai 73 - Car_Nicobarese bible

Salmai 73

¹Kô-en An ngam Tēv nö kôlò tī tö Israĕl: in yip töhëtö ellōn.

²Ngaich pöri chū-ö: höng öhngen minë kunröön chu: öhtö taleūsi vanāngö chū-ö.

³Pò chu kunyahaṅ elmat tö töyaha ṙô: hē chu meuk kanôlò tötlöök.

⁴Pò cha nö öt chanöku, i kinpaha cha: köp pöri öp kumlēḵ cha.

⁵Hö-ö yin nö sā kanihngen tahëng tarik: öt rēhĕn nö lëlngö nö sā tahëng tarik.

⁶Lökten ngam inkeūlen nö sayōk nö i likeun cha: kahumngen cha ngam chanökhuṙen nö sā hilā.

⁷Chilöl minë mat cha tö alaha re: meutnyi nup chanöh ellōn cha.

⁸Mināich cha-a, im öt lanöökö re, ngaich nö ṙô inkihten: marô-òl chūök ṙô yin.

⁹Haköp tö kūö elvāng re chā-a, nö lā-al minë halīöngö: ngaich nup litāk cha nö lök el ngam tumlat.

¹⁰Lökten yip tarik Ò nö havan nö ihih: ngaich öp töhĕng mikōpö mak nö öthëny tö kūö cha.

¹¹Ngaich ngö ṙô chā-a, sitih mikahlōn Ang ngam Tēv? Akaha Ang ngam Lamātulöng?

¹²Yĕh meuk, chā-a yin vē tötlöök; kūö cha nö tö-örheūheu nö i lanööṙen: ngaich ṙūölöre kanôlò chā-a.

¹³Kô-en chin chök alaha halööklö ellōn re: ngaich söichngö tī re öt hòṅ akah tökööl.

¹⁴Öt hĕnghang sumkam chin halëli: chöken örheūheu tö peuheū.

¹⁵Yē chu ngö ṙô, Ngö ṙô chin min: michūṙen inlaha chin i tumkölchap vē kūön Meh.

¹⁶Hē chu piṙūtkö mikahngenre tö e: ngaich kalē-ĕ chanökö angū-ö nö in chu;

¹⁷Hanöng saha chu chuh el ngam töhet chūök ngam Tēv: öich piṙūtngen öp kanô-en cha.

¹⁸Kô-en Man ṙāten cha i chūök tötakeūsa: kuringten cha Man i öt inkôlò.

¹⁹Sitih aich nö payāyi nöng öt rô-òtuṙen: keuheūtngöre yin tö kūö pinhe-eṅkūö.

²⁰Sā heūvö tö anahen: ngatī Ō Mā, yē Meh hareutlöre, öt kūöngen tö nyat cha.

²¹Pò chu haṙivlōn: ngaich lòklöre el rahēḵ chū-ö;

²²Öt akaha chin, pōihangṙen höng sā töṙeūla chin i kūö Meh.

²³Iṙūhen pöri chū-ö in Meh: ṙapkö lahāmö chu Më-eṅ.

²⁴Hachōkūö chu töp inlēnö aṅ in Meh: ngaich kē-ĕ chu unôich im kanôlò Meh.

²⁵Achīö öp chū-ö chu el halīöngö, tön höng Më-eṅ: öt hĕngtak ing panam tösā Meh nö lōn chu.

²⁶Öt kalēḵngôre ngih alaha chu, ellōn chu inrē: ngam Tēv pöri kumlēḵ ellōn chu, minchööḵö nöng örheūheu.

²⁷Yĕh meuk, pò cha nö öt kôlò min vē tömarôvat tö Meh: ngāchövah tī Man tö cha yip ṙamāngen Meh.

²⁸Tölöök pöri angū-ö nö in chu öich ṙūötöre im Tēv: vīlö ngam Mā Tēv chin nö innyatlö chu, hòṅ chu vënyö nup vahīṙen Meh nö ṙòkhöre.