Read Car_Nicobarese Salmai 77 Bible Online

Salmai 77 - Car_Nicobarese bible

Salmai 77

¹Hol tö ṙô re chin min havëkö ngam Tēv; hol tö ṙô re im Tēv: ngaich Anga-aṅ min nö hang ṙô chu.

²Chöh ngam Mā chin ip hē re kihngen: hateutnyu ngam kël chu tö hatööm, öt kirūpö; sööḵ ngih nômö chu nö haṙāmölōn.

³Fēken ngam Tēv chin, öt ṙānāmulōn: vë-eny miṙivlōn re chin, ngaich tööḵlö ngih ellōn chu.

⁴Öt meuichtöre në mat chu tö tī Meh: öt kô chū-ö ṙô-òv tö kanihngen re.

⁵Fēkö nuk hötṙeh chin sakāmö: nuk samyeūheu ik misī.

⁶Fē-ĕlre chū-ö tök tinlöökö ik hatööm: vë-ekūö ellōn re chū-ö; ngaich ap ellōn chu nö chöh, nö haṙēmngenre.

⁷Höng örheūheu ang ngam Mā nö kavalhanga: öt ngöhören hòng inrē ngam miṙēlōn Ò?

⁸Ngaich ök miṙēlōn Ò nö chuhngöre: öt teunglen hòng inrē ap kinlēḵngô Ò?

⁹Vaichngö Ang ngam Tēv tö miṙēlōn re: i lanīnö re Angah nö löpngökūö miṙēlōn re?

¹⁰Ngaich ngö ṙô chū-ö, öt kumlē-en chu an: köpölōn pöri chū-ö tö ngam lahāmö ngam Lamātulöng nö haṙī-ingre.

¹¹Hòṅ kakkö në la-en ngam Mā Tēv chin: hòṅ chu min köpölōn tö nuk tī Meh pinngangkūö misī.

¹²Piṙūtkö minë la-en chin min: ngaich haköptöre i në vahīṙen Meh.

¹³Ō Tēv, el ngam töhet chūök Meh ap talöökö Meh: ap yòh ap tö kiröng tēv, tö sā ngam Tēv hī?

¹⁴Më-eṅ Mā Tēv, vamī pinngangkūö: mikahtölōn vē tarik Man ngaich tö ngam kumlēḵ re.

¹⁵Ṙānyö vē tarik re Man ngaich, Öm aṅtī tö ngam kël re: vē kūön Yāköp. Yôsĕf inrē.

¹⁶Ō Tēv, meūkö Meh ngam mai: ngaich pa-ekūö: kichëyöre inrē ngam tö-aṙū.

¹⁷Ṙöstö mak minë taṙul; kunṙôkö minë halīöngö: ngaich nup hanyālö Meh nö parāti röön.

¹⁸El ngam kuföt lamfeui ap ṙô ngam kunṙôkö Meh; hatlökūö nup hanyālö Meh tön paman: kichëyöre ngih panam, kayīna inrē.

¹⁹El mai ap talöökö Meh, nup kanröönö Meh inrē el ngam yöng mak: ngaich nup röön Meh nö öt ankahen.

²⁰Sā pököre yin vē tarik Meh, nö hachō-o tö Meh: nö eltī Môsös, nā Āròn.