Read Car_Nicobarese Salmai 79 Bible Online

Salmai 79 - Car_Nicobarese bible

Salmai 79

¹Ō Tēv, yih yin vē pumnāmö tarik nö i vē amin Meh: hachōchi an nö ngaich ngam töhet chūök Meh; ngaich nö hulalten Yērusalem nö fônghaka.

²Kētu nun në alaha vē kūön Meh tö cha, nö kā në chehechōn el taṙul: në alaha vē töhet nö kā në töṙeūla el tumlat.

³Kitaknyu mahām yin tö cha nöng sā mak, nö vinngö nö i Yērusalem: öt hĕng tak lamāpngen cha.

⁴Ngaich in vītöre minṙēngö i vē hol re: minnôn, minyīöl cha inrē, vē mahavīlen ih.

⁵I rô-òten Öm min līn in ih, Ō Mā Tēv: höng örheūheu?

⁶Hōngtö kui yip tahëng mihëṙö Man tö ngam lanīnö re, yip töt akahakūö tö Meh: i kui nup pūlngö inrē töt mahavëkö mine-eny Meh.

⁷Pò cha nö ngeūkten Yāköp: piyāingö ngam elyöngö Ò inrē.

⁸Uh Man köpölōn lā in ih, tö nuk tökööl yik muvöhngö ih: hökngen ngam miṙēlōn Meh nö urēhĕkūö ih, tön ngaich in tumṙeūtu.

⁹Holṙen ih, Ō Tēv, inyööken ih, nö ineū-euṅ ngam minë-eny Meh: ṙānyen ih inrē, ahetngö në tökööl ih, lökten im mine-eny Meh.

¹⁰Sitih ṙô aich vē tahëng mihëṙö nö ngö ṙô, Isuh Ap Tēv cha: Hökngen ngam invahalvah nuk mahām yik kūön Meh tö kitaktu, nö akahiṙen nö in yip tahëngmihëṙö, nö i kūö ih.

¹¹Hökngen ngam unhômö miṙivlōn yip tö kē-ĕ nö yihtöre nö i kūö Meh: sā ṙôkö ngam kumlēḵ Meh, haköpken cha yip tö halēntu nö im kinpaha.

¹²Kĕ-ekūö yip hol ih, sat chap nö el ranôṙö cha, nup minṙēngö tī cha, Ō Mā: nup minṙēngö Meh tö cha.

¹³Hòṅ ih ihö tarik Meh, sīṅp Meh inrē aṅ kui kiyôp, öi örheūheu ha-öinyö Meh: hameuktö nöinyö in min i tumkölchap nö ṙòkhöre.