Read Car_Nicobarese Salmai 80 Bible Online

Salmai 80 - Car_Nicobarese bible

Salmai 80

¹Ō yōm vē pököre Israĕl, hangihtöre, ngaich Man hachōnyen Yôsĕf sā kinteūmö pököre: Me-eṅ amūichhak i hôi yip karupīm, yang Man yēḵ.

²Urēhĕkūö Ifrēm, Penyamin, Manasē inrē: hareutlö ngam kumlēḵ re Man tā-a yih, hayööken ih.

³Havanten ih hēk, Ō Tēv: vīten ngam kūö Meh nö yang, hòṅ ih hayöökaṙen.

⁴Ō Mā Tēv, yip tö maṙôngö: i rô-òten Öm min līn i vine-eṅkūö re tö vē tarik Meh?

⁵Ha-aṅlöng yin tö Meh tö makmat: ha-ôkö yin tö Meh tö makmat nö pōivat.

⁶Vītu in tö Meh linā-alkūö i vē hol re: ngaich vē lā-al ih nö hayīölngen ih nö in re.

⁷Havanten ih hēk, Ō Mā Tēv yip tömaṙôngö: vīten ngam kūönre nö yang, hòṅ ih min hayöölöngṙen.

⁸Kēnyö ngam vāin Man nö ṙā-ang Aikup: ngaich Öm ahōngö pumnāmö tarik, ngaich teūichten e nö umuh.

⁹Urēhĕkūö e Me-eṅ halēnten chūök e: ṙēhtöre ngaich angū-ö nö aṙū-uti, ngaich hatööḵlö ngam panam.

¹⁰Kahultöre kui minë rôngö tö nyat e: ngaich nup pak ò nö sā nup tökôlò sītör ngam Tēv.

¹¹Söömngö nuk pak re anga-aṅ nö el mai: nup misīöpö e inrē nö el Tahël.

¹²Kūöyòh öm tīṙōlngö minë kinlonglö Ò: ngaich acha-a yip lamök umuh, nö teuklen Ò?

¹³Ngaich nup ha-un el inchōn nö ungehngen e: ngaich nup aṅ el inchōn töṙeūla nö nyāngen e.

¹⁴Ō Tev yip tömaṙôngö, hayāichtöre in ve-ekūö Meh, havantöre hēk: Ngëicha Öm el halīöngö, meuk inrē, chöhkö ngòh vāin.

¹⁵Laklö ngam taneūich, ngam taheūichtö ngam lahāmö kël Meh: ngam pak inrē ngam tö vītu nö ngëḵ nö Me-eṅ Meh.

¹⁶Föngiyö an tö tameūyö, ṙāliyö an: lëlngö nun tö vinëköre tö ngam kūö Meh.

¹⁷Hökngen ngam kël Meh yēḵ, nö i kui ngam tarik lā hāmö Meh, i kui ngam kūön tarik, ngam tö vīlöng tö Meh nö tökalēḵ, nö Me-eṅ Meh.

¹⁸Hòṅ ih min öt havanngöre ṙāngen Meh: ha-aṅhaṅ ih, ngaich havëkö mine-eny Meh min īhö.

¹⁹Havanten ih hēk, Ō Mā Tēv yip tömaṙôngö: vīten ngam kūö re nö yang, hòṅ ih min hayöölöngṙen.