Read Car_Nicobarese Salmai 83 Bible Online

Salmai 83 - Car_Nicobarese bible

Salmai 83

¹Ō Tēv, uh Man hachēvngenre: Ō Tēv, um öt ṙô-òv, um öt halöinyköre inrē.

²Yĕh meuk tö vē lā-al Meh nö tiṙōllenre: hachônglö kui re yin vē tö sumrīk tö Meh.

³Milichngen öp inlēnö tö cha, nö lā-al vē tarik Meh: ve-ekūöre yin nö lā-al yip in Meh tönyatngö.

⁴Ngö ṙô yin, Tā-a, töi rökngen cha nö pumnāmö tarik: hòn öt ngöhören nö köp ngam mine-eny Israĕl.

⁵Pò cha nö hĕngren lōn nö halēn ṙô re: lā-al Meh yin nö kilēḵngôre.

⁶Nup inrūkui Ētöm, aṅ Ismail inrē: Mô-ap, aṅ Hakār inrē;

⁷Kīpāl, Amön, Amelek inrē: Filistia, hol tö yip aṅ Tūrös inrē.

⁸Hanôltöre nö in cha inrē Asirīa: holṙen yip kūön Lòt yin.

⁹Sā tī re Man yēḵ tö yik aṅ Mitīa in cha: sā Sisera, sā Yāpin, ip tahël Kisòn.

¹⁰Yik tö lëlngö nö i Entòr: vītöre cha-a ngaich nö sôḵ nuā ngam tumlat.

¹¹Vīten yik mā cha nö sā Ôrep, sā Sip inrē: hôṅ, ṙòkhöre yip kūön rācha cha, nö sā Sepah, Salmôna inrē.

¹²Yik tö ngö ṙô, Ta-a töi kē-ĕ e nö amin hī: ngam elyöngö ngam Tēv.

¹³Ō Tēv chu, vīten cha nö sā pitung röön lamfeui kuföt: sā nup kaṙālö afō nö i kūö kūföt.

¹⁴Sā öp tameūyö tö ṙāpngökūö tī tö chūölchōn: sā öp hanūkūö tameūyö tö öktikūö tī tö minë rôngö.

¹⁵Ngatī lū-u cha töp tö kalēḵ, kuföt tī Meh: pinhëken cha tap tī Meh chanôchö panam.

¹⁶I kūö cha tī tap kintöngngö ellōn, Ō Mā Tēv: hòṅ cha nö chöh ngam mine-eny Meh.

¹⁷Hökngen cha yēḵ nö sirōngkūö nö uṙeh inrē nö urāḵngen: hôṅ, hökngen cha nö kalūöchöre mikah, payāyi inrē.

¹⁸Hòṅ cha nö akahalōn tö Meh höng Me-eṅ, Öm tö minënyu tö Yāvēh Lamātulöng tö në panam nö ṙòkhöre.