Read Car_Nicobarese Salmai 86 Bible Online

Salmai 86 - Car_Nicobarese bible

Salmai 86

¹Ō Mā Tēv, asītö elnang re, sapṙô chu inrē: tön yāich chin, tö-iyāich inrē.

²Laklö ngih nômö chu; tön lā im lanööken chin: Ō Me-eṅ Tēv chu, hayööken ngòh kūön re Man, ngòh mahayönglenre nö in Meh.

³Ō Mā, aheukölōn yēḵ tö chu: tön Me-eṅ Man tö peuinyhukūö tö chu i rôta ngih sakāmö.

⁴Haṙamlōn ngòh kūön re Man yēḵ, Ō Mā; tön in Meh chin hachohlö ngih ellōn re.

⁵Pò Meh, Mā, Öm tölöök, hamöngöre inrē Öm aṙē-ĕl: tö pōyen aṅ in tö miṙēlōn, tö cha nö ṙòkhöre, yip mahavëken Meh.

⁶Ō Mā Tēv, kētö el nang re Man i ṙô chu ve-ekūö Meh; hang nup vine-elkui ṙô chu.

⁷Havëken Meh chin min ip hē chu kihngen: pò meh min sapṙô chu.

⁸Ō Mā, öt hĕng tak tö sā Meh nö i vē tēv: öt rēhĕn nup töng la-en nö sā nup la-en Meh.

⁹Ō Mā, ṙòkhöre vē vahī Meh pumnāmö tarik min nö salām nö i kūö Meh: hapōilö ngam minë-eny Meh min inrē.

¹⁰Pò Meh Öm tikiröng, vamī pinngangkūö inrē: höng hĕng tak Man Tēv.

¹¹Ō Mā Tēv, haköpten chu tö ngam talöökö Meh; hòṅ lök im kanô-en Meh chin: hamūl tö ellōn chu öich pa-ekūö tö ngam mine-eny Meh.

¹²Ō Mā, Tēv chu, hòṅ ha-öinyö Meh chin, öich keuheūttö ellōnre: hapōilö ngam minë-eny Meh chin min örheūheu.

¹³Pò ngam miṙēlōn Meh nö kiröng nö in chu; ngaich Me-eṅ inrē ṙānyö ngih nômö chu ṙā-ang el chūök kupah.

¹⁴Ō Tēv, choholre yin vē mahakeūlenre nö lā-al chu: vē ṙôngö vē tötainy inrē nö chöh ngih nômö chu.

¹⁵Ō Mā, Me-eṅ pöri Tēv chu, tö tööḵlö tö miṙēlōn, neūkölōn inrē töt veūtö tanānyö, töpōyen miṙēlōn, kanô-en inrē.

¹⁶Havantöre in chu, aheūkölōn tö chu inrē: kētö kumlēḵ re Man ing kūön re, hayööken ngòh kūön öp kūön Meh kikōnyö.

¹⁷Hameuktö ap minkahngö tölöök, hòṅ cha nö meūkö e, yip tö sumrīk tö chu, ngaich sirōngkūö: pò Meh Mā, Me-eṅ hamòlṙen chu, mahaṙamlōn chu inrē.