Read Car_Nicobarese Salmai 9 Bible Online

Salmai 9 - Car_Nicobarese bible

Salmai 9

¹Keuheūt tö ellōnre chin min ha-öiny ngam Mā Tēv: ha-meuknyö nup pinngangkūö chin min vahīṙen meh.

²Ṙāmölōn chin min, tö nöinyö ngam minë-eny meh: Ō më-eṅ lamātulöng.

³Yē yip lā-al chu nö hapung tö ukre: kavē-ĕre cha-a lëlngö inrē nö i kūö meh.

⁴Pò meh ṙapkö ngam chanīpö chu, ngam chööḵnyö chu inrē: Ūichhak më-eṅ el kan-tēre, chīpö ṙô kahôka.

⁵Vëkö vē pumnāmö tarik më-eṅ piyāingö vē tötlöök më-eṅ: ngaich man sichngö minë-q eny cha i tö-örheūheu.

⁶Öt ōtre min ngam tökunyaha elmat, öt ōtren cha-a nö i chūökre nö urāḵngen: nup elpinnāmen tiṙōlngö meh, payāyi öp kanöpölōn tö u.

⁷Örheūheu an ngam Mā Tēv nö ūichhaka nö sā rācha: halēn ngam kantēra re an nö im inkaha.

⁸Chīpen min ang-aṅ nö akah fālen ngih panam: im chaniplen an min nö kahòk-ken vē tarik.

⁹Tömarô-òl kui an ngam Mā Tēv, chūök chamônga, lanaklö yip töhakihtuṙen: tömaṙô-òl kui chūök chamô-nga hē el kanihngen.

¹⁰Hayönglenre min nö in meh yip tö-akahakūö tö minë-eny meh, Mā Tēv: pò meh öt ṙāngen cha yip chamöhö meh.

¹¹Tiköknyö nöinyö ngam Mā Tēv, ngam mi-iyöng Siyòn: vë-eny nang yip tarik tö nup la-en ò.

¹²Pò ngòh mahatönken mahām nö köpölōn tö u: öt vaichngö an tö ṙô yāich nö peuiny.

¹³Ō Mā Tēv, aheūkölōn tö chu; ngëichkö kanihngen chu, tī yip tösumrīk tö chu, më-eṅ chamitlen chu ṙā-ang nup kinpaha.

¹⁴Hòṅ chu hameuknyö nup nöinyö meh, i kūö nup inkūp ngam kikānö kūön Siyòn: ṙāmölōn chin min i ngam tī meh inyööken.

¹⁵Chaṙipköti yin vē pumnāmö tarik nö el öp anūlö vahī cha: el öp inhāl ulāitö cha nup kalröön cha nö vönngö.

¹⁶Vītenre an ngam Mā Tēv nö akahaiṙen, akah fālen an: ngòh tötlöök tingöpngöre nö i nup vahīten minë kuntī ò.

¹⁷Havantöre ön min ngòh tö-tlöök nö el chūök kupah: ṙòkhöre yip pumnāmö tarik tövaichngö tö ngam Tēv.

¹⁸Pòn öt hō nö örheūheu nö vāchiṙen ngòh töhāṅten: öt rēhĕn öp maheūṅkkö ngam yāich nö payāyi nö örheūheu.

¹⁹Ō Mā Tēv, choholre; un mihôiṅ ngam tarik: hökngen vē pumnāmö tarik nö kahòk-kaṙen nö i kūö meh.

²⁰Ō Mā Tēv, pinëṅken cha: hökngen vē pumnāmö tarik nö akahalōn töre nöng tarik.