Read Car_Nicobarese Salmai 90 Bible Online

Salmai 90 - Car_Nicobarese bible

Salmai 90

¹Mā Tēv, Me-eṅ elyöngö ih: i tumkölchap.

²Urĕh tö insīöpnyö në rôngö hēk, urĕh tö tī meh vīlö ngih tumlat, tö ngih panam inrē: ngaich höng me-eṅ Tēv, töt ranehluvö, töt manāngenvö.

³Havāng tö tarik me-eṅ nö pitung; ngaich ngö ṙô: Havantöre yin yī-ö kūön tarik.

⁴Pòn i kūö meh nö hĕng köṅny samyeūheu: ngaich pöri nöng sā vahë yē e nö ngaich: sā inahati tö hatööm.

⁵Kē-ĕyö nun tö meh sā tö hëmngö: sā inṙôhò nun, sā kiyôp nun tö el peuheū, nup samīöp.

⁶Im peuheū angu-ö nö vai, sīöplö inrē; im harap angū-ö nö fāngi, ngaich nyangngö.

⁷Pò ih ngaich keuheūt im kumnyahlōn meh: kūö lanīnö meh īhö kihngen inrē.

⁸I kūö ih nun në ötlanöökö ih tö tī meh: në tö ulāikaṙen tökööl ih, i hanātö ngam kūö meh.

⁹Pò në sakāmö ih nö chuhngöre kūö lanīnö meh: keuheūtirit nun në samyeūheu ih tö ih, nöng sā nup minôn ṙô.

¹⁰Samat anāi nun në samyeūheu ih, hēk höngkūö kumlēḵ nö hëvhör anāi: sön pöri ngam kumlēḵ u, nöng ṙanëyö, miṙivlōn inrē; pò e nö ka-euingö rit, ngaich öt ōtre īhö.

¹¹Achīö ap tö akahalōn tö kumlēḵ ngam kumnyahlōn meh: ngam lanīnö meh inrē, sā ngam pinhe-eṅ meh?

¹²Ngatī mikahten ih kaheuk sakāmö re: hòṅ ih kē ellōn re tö tö-akaha.

¹³Ō Mā Tēv, havan man: i ṙôktören: havöötö ellōn re man yēḵ i vē tarik meh.

¹⁴Hatööḵngen ih man tö el peuheū, tö ngam miṙēlōn re: hòṅ ih ṙāmölōn i rò-òtö në sakāmö ih.

¹⁵Vīten ih ṙāmölōn sā nuk sakāmö hē meh chökṙen ih: sā, samyeūheu inrē hē ih meuk tötlöök.

¹⁶Hökngen nup la-enre man nö meūkö tö vē tarik meh: ngam kanôlò meh inrē nö meūkö nö i kui vē kūön cha.

¹⁷Hökngen ngam lanöökö ngam Mā Tēv ih nö i kui ih: haköpngö ngam la-en ih man nö i kui ih; hôṅ, ap la-en në kuntī ih, haköpngö e me-eṅ.