Read Car_Nicobarese Salmai 94 Bible Online

Salmai 94 - Car_Nicobarese bible

Salmai 94

¹Ō Mā Tēv, Me-eṅ Tēv lökngörit invahalvah: yang Man yēḵ.

²Hachônglöre Man, Me-eṅ ma-akah fālen ing panam: kē-ĕkūö ngam mahakeūṙöre tap manā-angkūö ò.

³Mā Tēv, irô-òten ang min ngòh tötlöök nö mihôiṅ?

⁴Mëichngö ṙô re yin, hakeūlôre yin: ṙòkhöre vē tö la-evṙen tö tötlöök nö eū-eu re.

⁵Ō Mā Tēv, panyeny yin vē tarik Meh nö likölö tö cha: hakihten vē amin Meh yin inrē.

⁶Fëli yin vē tafīösi, aṅ tahëng inrē tö cha: kumpaha kūön yōich inrē.

⁷Ngaich ngö ṙô cha-a, öt hō An ngam Mā Tēv min nö meuk: öt rēhĕn ngam Tēv Yāköp min nö Ngëicha.

⁸Ngëicha, yī-ö tötlē-ĕ aṅ i vē tarik: yī-ö inrē tö kulō-ov, ĕhē öi min hō akaha?

⁹Anga-aṅ ngam vamī tö nang, öthō Ang min nö hang: Anga-aṅ ngam vamī mat, öt hō Ang min nö meuk?

¹⁰Anga-aṅ ngam chamökṙen pumnāmö tarik, öthō Ang min nö vë-a: Anga-aṅ ngam mahaköptö mikah tarik?

¹¹Akah chanöh ellōn tarik An ngam Mā Tēv: tö u nöng chanök-alaha.

¹²Tökôlò ön ngòh tarik, ngòh töchöken tö Meh, Ō Mā Tēv: tö haköptu inrē tö Meh tö aṅ im chöngö.

¹³Hòṅ Meh kē-ĕkūö ò tö haneūheu, löktökūö nuk sakāmö inkihten: hanöng saha ap anūlö ap tötlöök nö ūlö.

¹⁴Pò ngam Mā Tēv min nö öt kavalngö vē tarik re: öt rēhĕn An min nö ṙāngö ngam amin re.

¹⁵Pò ngam inkaha fālen min nö havantöre nö im lanöökö: ngaich ṙòkhöre min yip töchiplö ellōn nö tömrit e.

¹⁶Achīö ap min chamôhòlre nö lā in chu nö lā-al vē tötlöökö lā-en: achīö ap min samöklöre nö lā in chu nö lā-al vē töla-evṙen tö tökööl?

¹⁷Yĕn öt Mā Tēv öre hamòlṙen chu: ngaich öre ngih nômö chu nö öt ṙôktörevöṙen nö iyöng el ngam tö chēv.

¹⁸Hē chu ngö ṙô, Taleūchi röön chin: ṙapka chū-ö tö ngam miṙēlōn Meh, Ō Mā Tēv.

¹⁹Iṙôken nup chanök ellōn chu, lātuhēt ap inṙamlōn, aṅ in Meh: nö kuchīkölōn tī töng ma-alaha chu.

²⁰Innôluvö öng ngam kantēre öt lanöökö tö aṅ in Meh: ngam vamīlö chöngö töchökhu?

²¹Hamūlöre yin nö ṙòkhöre, nö lā-al nômö ngam tölöök: ngaich kumpah ngam töt fāluṙen.

²²Ngam Mā Tēv chu pöri tö marô-òlkui nö tananglö chu: ngam Tēv chu inrē ihong lanaklö chu.

²³Ngaich Anga-aṅ nö kētö kui cha tö nup tökööl cha, ngaich rökngen cha min i nup tötlöök in cha: ngam Mā Tēv, ngam Tēv hī An min ramökngen cha.