Read Car_Nicobarese Salmai 95 Bible Online

Salmai 95 - Car_Nicobarese bible

Salmai 95

¹Tā-a töi tikökhökūö ngam Tēv: tā-a töi hol tö el lōn re ṙāmölōn i kumlēḵ ngam inyööken hī.

²Tā-a, töi yihtöre i kūö Ò, kumtö nöinyö Ò: tā-a, töi hameuktö ṙanāmölōn re in ò, öi ṙô tö në salmai.

³Tön Yāhvē An tö kiröng nö Tēv: ane inrē Rācha vē taṙòkhöre tēv.

⁴Eltī Ò në kūöngö ngih panam: amin Ò inrē në kanöpö në rôngö.

⁵Mai hòng inrē, ngaich nöng amin Ò: kuntī Ò ngih eltanyô inrē.

⁶Tā-a, töi sōntökūöre ve-ekūö Ò: līvngöre i kūö Yāhvē ngam Vami-i hī.

⁷Tön Anga-aṅ An Tēv hī: ha-aṅhal Ò in a-yī-ö tarik, pököre inrē me-el tī Ò.

⁸Hang ṙô Ò yin tötaheui: Ui hangë-eng ellōnre, sā re i Meripah; sā hē ök sakāmö Kinlaha el tönyaṅlnyi.

⁹Hē yik muvöhngö yīö nö kalaha chu: kalahken chu, ngaich meuk la-en chu inrē.

¹⁰Fën anāi samyeūheu rô-òten chin harivlōn i ngih tumköl chap: ngaich öich ngö ṙô, Tarik yin tövāchö kū-ö ellōn; öt akahakūö yin tö në talöökö chu.

¹¹Lökten chu i lanīnöre: chūökuṙô tö cha nö öt kuhēthötre, nö im haneūheuṅ chu.