Read Car_Nicobarese INCHŌḴ-OṘÔ 1 Bible Online

INCHŌḴ-OṘÔ 1 - Car_Nicobarese bible

INCHŌḴ-OṘÔ 1

¹Inchōkoṙô Sòlòmön, ök kikōnyö kūön Tāvit, rācha aṅ Israĕl:

²Hinôtö tarik nö akahakūö tö mikah inköphöti inrē, akaha elnang tö ṙô öp lamātuhēt mineukö,

³Kē inköphöti ip tölöök tölöökö alaha, lanöökö, kinṙôka tötmichūṙen, töṙong inrē;

⁴Hòṅ ngam mikah nö kētu nö i töt-akaha, inkaha mikah elmat inrē nö i tö-ayal

⁵Hòn hang inrē tö-akaha tarik ngaich ṙūölö alahare i inköpö, hòn huveū-en inrē tö-akaha elmat tarik,

⁶Nö akaha el mat tö inchōḵoṙô kaha ṙô inrē tö nup ṙô tö-akaha kinlah huneū-eu elmat inrē.

⁷Ranehlö an ngam inkaha i pin hë-eṅkūö tö ngam Mā Tēv; ahūöngö mikah vē tökulō-ov inköphöti inrē.

⁸Kūön chu, hang inköptöre tö yöng re kikānö;

⁹Tön tövai nun nö tachöklö kui meh, neūmö likeun meh inrē.

¹⁰Kūön chu, yē tötlöök nö haṙöingen meh, um hōḵ.

¹¹Yē cha nö ngö ṙô, Tā-a in ih, töi höng finël tarik, tā-a töi tölngenre hayun töt akaha,

¹²Tā-a töi sā kūö Chūök Tökapah mīktö tö-aṅ nöng nòngre, sā cha yip chamuh el Anūlö;

¹³Kôtökūö in min tö töpōi ṙāi chehen hatöö-öl patī re min ayī-ö tö tökīlö tö hī;

¹⁴hamūltöre man in ih, hòṅ hī höng hēngö inyul pësa

¹⁵Kūön chu, uh man lök el talöökö cha, um vāngtöre el talöökö cha;

¹⁶Tön i tötlöök nup kalröön cha nö fal, kurāten yin nö kitaknyö mahām.

¹⁷Chök alaha öp inhāṅl nö hanyāknyu nö i kūö chehechōn;

¹⁸Ngaich pöri vē tarik nöng höng mahām re, ṙātö inyun nômö re yin.

¹⁹Ngatī talöökö yin nö ṙòkhöre vē töteūngen tö kanôlò re lökten i chanökhuṙen; kēngö nômö ngam yōm re an.

²⁰El talöökö ngam mikah pōitô nö hū-a; el chūök mī-inyih angū-ö nö hachônglöṙô re;

²¹Hū-a an nö i kui kinlōngö; ṙô-òv an nö i lökhöt inkūp elpanam;

²²Iṙôktören Ō yī-ö töt-akaha, hāngenlōn öm, öm öt akah? Iṙôktören min maha-āichngen nö kumchikngenre ip nāichngen tö cha, tökulō-ov inrē surīkhö mikah?

²³Kūötenre tö ngam vinëköre tö chu; yĕh meuk, ṙösnyö ellōn re chin in meh; hòṅ mikahtölōn meh chin tö në ṙôre.

²⁴Pò chu havë-a ngaich sō me-eṅ hang, hateutnyö kël re chū-ö ngaich öt hĕng tak tökūötenre,

²⁵Ngaich me-eṅ inrē sō-o nup inlēnö tö chu sō inrē öm vëka tö chu.

²⁶Hayīölngen öt kanôlò meh chin min inrē; ha-öinyngö vah meh chin min yĕm chök tökūö pinhë-eṅ kūö,

²⁷Yē öp pinhë-eṅkūö nö sā chanôcha panam nö chökhutī tö meh, sā lamfeui kuföt inrē ngam öt kanôlò meh nö yih, yē ngam kanihngen mirivlōn inrē nö yih nö in meh.

²⁸Ngaich havëken chu min cha-a, hö-ö pöri min chū-ö sapṙô; haṙēmngenre yip min nö chöhö chu hö-ö pöri chū-ö min kôti.

²⁹Pò cha nö surīkhö mikah öt atöllö ngam pinhë-eṅkūö inrē tö ngam Mā Tēv,

³⁰Sōḵ tö inlēnö aṅ in chu, hayëḵngen vinëköre tö chu inrē,

³¹Lökten yip min nö nyā ṙòng aṅ el talöököre ngaich tööḵngen tö aṅ i vahītenre.

³²Pò öp töt akaha nö fëli tökūö ngam invöökūö cha, ngam tanöö-öng lōn tökulō-ov inrē nö fëlngen cha; anga-aṅ pöri öp hamang ṙô chu köp min nö iyöng kuchīken min inrē, öt pa-ekūö tö tötlöök.