Read Car_Nicobarese INCHŌḴ-OṘÔ 10 Bible Online

INCHŌḴ-OṘÔ 10 - Car_Nicobarese bible

INCHŌḴ-OṘÔ 10

¹Inchōḵoṙô Sòlòmön, Ṙāmölōn tī ön tö yöngre kikōnyö, ngòh tö akaha nyīö kikōnyö, miṙivngölōn yöngre pöri tö kikānö ngòh tö kulō-ovö nyīö kikōnyö.

²Öt kanôluṙô nup kanôlò aṅ i tötlöök nö teūngen, ṙā-ainy pöri lanöökö ṙā-ang kinpaha.

³Öt hökiṙen an ngam tölöök nö kapahare tö ngam Mā Tēv, harahkūölōn ngam tötlöök pöri anga-aṅ.

⁴Öt kôlò tī an ngam töṙāhata kël, kôlòti pöri ngam kël töpētngen.

⁵Tö akaha ön ngòh nyīö kikōnyö mahamūl hē el sikehngö, kētö sumrōngkūö pöri ngòh nyīö kikōnyö mahaṙòh hē inmūlö ṙòng e.

⁶I kui tölöök nup inkôlò, hayunngö chanökhuṙen pöri ngam elvāng tötlöök.

⁷Inkôlò an ngam kanöpölōn tö tölöök, chahū-ui pöri min minënyö tötlöök.

⁸Hangihtöre an ngam ellōn tö akaha tö në chöngö, yīhi pinlāngen pöri ngòh mahakeūlôre tökulō-ovö.

⁹Ngòh lamök i hinëngö lök i kanöpöre, ngòh mahachōichngö talöököre pöri kôti min.

¹⁰Vīten kanihngen ön ngòh nyamichkö matre, vītö lanāmö pöri ngòh töt piyū-u ṙô nö vë-a.

¹¹Löklö nômö an ngam elvāng tölöök, hanyatngö chanökhuṙen pöri ngam elvāng tötlöök.

¹²Harunnyö linā-alkūö ngam sunrīkhö; hanyatngö fālen pöri hanāngenlōn.

¹³Kôti mikah nö i minuh ò ngam tö akaha el mat, chōn pöri i uk ò ngam tö hāṅten tö mikah.

¹⁴Hamūlngö mikah yin vē tö akaha tarik, haröhtö öt kanôlò pöri ngam töng ṙô elvāng tö kulō-ovö.

¹⁵Ngam töngëḵ elpanam an kanôlò ngòh tarik tökôlò; ngam pinyāingö cha ötkanôlò ngam yāich.

¹⁶Chuh im nômö an ngam raneushö tölöök, im tökööl ngam taneūngen tötlöök.

¹⁷El kanröönö nômö an ngam mahangihtöre tö inköphöti, lō-ongkūö pöri ngam tösōḵ nö vëka.

¹⁸Tö minyôny-aṅ minuh an ngam mahanyatngö sunrīkhö, tökulō-ov inrē ngam tö ṙô tö sinūöcha.

¹⁹Öt hāṅten tanôichngen, yĕn maṙôngö ṙô, tö akaha pöri ngòh mahaköp minuh re.

²⁰Tölöök an nö rupīö ngam litāk ngòh tölöök; tö kūöṅnen ṙāi ngam ellōn tötlöök.

²¹Maṙôngö ha-aṅlö an ngam minuh tölöök, kapah pöri ngòh tö hāṅten tö mikah.

²²Vītö kanôlò an ngam inkôlò aṅ im Mā Tēv, öt ṙūöten miṙīvlōn anga-aṅ inrē nö in e.

²³Sā minyam an ngam tö vāich la-en nö i ngòh tö kulō-ovö, kumchiklōn tarik pöri tö akaha elmat ngam tölöök inlaha.

²⁴Öp pinhë-eṅkūö öp tötlöök teung hökui ò min, kētu pöri min öp lōn ngòh tölöök.

²⁵Yĕn changāchi öp chanôchö, öt ōtre ngaich ngam tötlöök, örheūheu pöri nö köp ngam tölöök.

²⁶Sā tö hikīölhu vāin nö i kanap, lul inrē nö i mat, ngatī ngòh töṙāhata nö in cha yip tamīnngen ò.

²⁷Marô-òtö tī an tö nômö ngam pinhë-eṅkūö töm Mā Tēv, cheūta pöri min nup samyeūheu tötlöök.

²⁸I ṙanāmölōn manāngen öp maheūṅkkö tölöök, öt teung tö yīhi pöri öp maheūṅkkö tötlöök.

²⁹Töngëḵ an ngam Mā Tēv nö chūök ò öp tö chiplen talöökö, tinṙōlngö pöri nö i tötlöök la-en.

³⁰Öt hētu min nö halönyka ngòh tölöök, öt iyöng panam pöri min ngam tötlöök.

³¹Kumtö mikah an ngam elvāng tölöök, ṙāti pöri min ngam litāk tö chōich,

³²Akahakūö an ngam minuh tölöök tö tö hō-ovö, ngam elvāng tötlöök pöri töp töchōich.