Read Car_Nicobarese INCHŌḴ-OṘÔ 11 Bible Online

INCHŌḴ-OṘÔ 11 - Car_Nicobarese bible

INCHŌḴ-OṘÔ 11

¹Sin-òṅkkūö ngam Mā Tēv an ngam tö minyôiny kinlah lumngan, kumchiklōn ò pöri ngam tölöök kinlah lumngan.

²Yih ngam inkeūlen, ngaich yih ngam miṙē-ĕv, im tö yāchö ellōn pöri ngam mikah.

³Inchōkūö cha an ngam hinëngö töchiplen, ngam tö kuròk tö michūḵ chanökhuṙen pöri fëlngen cha.

⁴Öt kanôlu ṙô në kanôlò ip sakāmö lanīnö, ngam lanöökö pöri ṙā-ang im kinpaha.

⁵Haköpö ò an el talöökö re ngam lanöökö tötfāluṙen, fukngö pöri ngam tötlöök i öt lanöököre.

⁶Ṙānyen cha an ngam lanöökö töchiplö, ngam tö michūḵ chanökhuṙen pöri kē-ĕ nö hakövö töp töyal lōn cha.

⁷Yē ngam tötlöök nö kapah, payāyi öp maheūṅkkö ò, öt teungtö yīhi ngaich öp maheūṅkkö ngam tötlöök.

⁸Ṙānyu an ngam tölöök ṙā-ang i kanihngen, ngaich ël e ngam tötlöök nö ṙëngen.

⁹Aṅtī tö elvāng re an ngam tötlöök tarik nö fëlngö holre, lökten i ngam mikah pöri ngam tölöök nö ṙānyuvö.

¹⁰Yē e nö lööken nö palā-aiṙen, pōitô ngaich ngam ṙanāmölōn.

¹¹Lökten i inkôlò aṅ i chaniplen ngam el panam nö hapōilöngö, tiṙöli pöri angū-ö tökūö elvāng tötlöök.

¹²Töt akaha ön ngòh mahakūönngö holre, ngòh tarik pöri tö akaha elmat öt ṙô-òvö nö höngngöh.

¹³Hameuktö töhayunka an ngam kumröönkö re nö söömngöṙô, anga-aṅ pöri ngam nyanatlö nö i ellōn haköp tö hayunka.

¹⁴I chūök töt inchō-ovkūö, fukngö tarik; öt palā-aiṙen pöri i töpōyen mahalēn,

¹⁵Anga-aṅ ngòh ṙënngô aṅ tahëng chök min nö in e, köp pöri ngòh tö sōḵ nö ṙënngô.

¹⁶Kēḵ ineū-eure ngòh tö aṙē-ĕvlōn kikānö, kēḵ kanôlòre inrē ngòh tö chökhuṙen tarik.

¹⁷Ngòh tarik tö aheūkölōn hakôlò re, hachököre pöri ngòh tarik töt milēḵ chanökhutī.

¹⁸Ngòh tötlöök tarik hayih raneushö tö michūḵṙen, ngòh tameūchtö lanöökö pöri kētö kô-en raneushö.

¹⁹Aṅ an min ngòh tö köp nö i lanöökö, kapah pöri min ngòh tamömrit öt lanöökö.

²⁰Sin-òṅkkūö ngam Mā Tēv yin vē tarik tö chōchö ellōn, kumchiklōn ò pöri cha-a yip töt chōchö el talöökö.

²¹Köpngöre, öthō ön ngòh tötlöök tarik nö öt sācha, ṙānyu pöri min cha-a yip tölöök.

²²Sā humlum kinlong i minuh ha-un ön ngòh tövai kikānö töt akaha.

²³Manāngen tö lanöökö öp lōn ngòh tölöök, i lanīnö ngam maheūṅkūö ngam tötlöök.

²⁴Hĕng tak tarik tö chulöṙen tī nö kē-ĕti, ngaich sön nö sīöplöre kanôlò, ma-iṅ tīre öp tahëng nö kē-ĕti ngaich nöng sön nö hāṅten.

²⁵Ṙūölöng kanôlò ön min ngòh tarik tö chulöṙen tī, ngòh ṙamös inrē min nö ṙösö.

²⁶Rūtngövah ò vē tarik ngòh mam-iṅ sāiṅy, i kui ò pöri öp inkôlò öp mī-inyihkö e.

²⁷Anga-aṅ ngòh töpētngen nö chöh tölöök chöh miṙēlōn, yih pöri ngam tötlöök nö in ò ngam chamöhö e.

²⁸Nyangngö ön min ngòh mahyönglen re nö i kanôlò, sā tö ayal rōichōn pöri ngòh tölöök min nö kôlòṙen.

²⁹Amin tö kuföt ön min ngòh mahakihten aṅ patī re, tarik alaha ngòh tö akah inrē min ngòh tö kulō-ovö.

³⁰Chōn an ngam ṙòng ngòh tölöök, kēngö nômö pöri ngam töt aṅhav-in tö chöngö.

³¹Yē ngòh tölöök nö haṙënhanga nö ing tumlat, mötlötī ngòh tötlöök tököölö fālen inrē.