Read Car_Nicobarese INCHŌḴ-OṘÔ 12 Bible Online

INCHŌḴ-OṘÔ 12 - Car_Nicobarese bible

INCHŌḴ-OṘÔ 12

¹Ngòh tö hangenlōn tö inköpö chöngö hāngenlōn tö mikah, tökulō-ov pöri ngòh tö sōḵ nö vëka.

²Teūngen ön ngòh tölöök tarik nö in Mā Tēv tö miṙēlōn, öt hakôlöng ṙô pöri ngòh tarik vamī-il tö chōich.

³Hö-ö ön ngòh tarik nö köp tö tī öt lanöökö, öt hētu pöri ngam ṙĕh ngòh tölöök min nö hanlönyken.

⁴Ngòh tö akaha pīhö kikānö sapīöv ngam pīhö re, ngam kikānö pöri kamëtö sumrōngkūö sā tö chahū-uyö el tangëḵ ò.

⁵Tölöök nup lōn ngòh tölöök; tömichūḵ chanökhuṙen pöri nup inlēnö tö ngòh tötlöök.

⁶Hayun mahām nup ṙô ngòh tötlöök, ṙānyö tarik pöri öp elvāng töchiplö.

⁷Kurīngiyö ön ngòh tötlöök ngaich öt ōtren, sökhak pöri min ngam patī ngòh tölöök.

⁸Eūka ön ngòh tarik sā öp tölöök in ò mikah, öt hakūökaṙen pöri ngòh tö chōchö ellōn.

⁹Ĕhten ön ngòh yāich tarik ngòh mahalinṙenre tö ngòh mahanyatkö elmat nö kiröng nö tarik nöng tö nyā-avkūö pöri.

¹⁰Ngòh tölöök tarik akahakūö tö nômö töṙeūla, öt milēḵ chanökhutī pöri ngam miṙēlōn ngam tötlöök.

¹¹Ngòh amulkö tumlat pōyen nyā-aṅkūö min, töng öt akaha pöri ngòh tamömkörit töng öt kanôluṙô.

¹²Taṙöli an ngam töngëḵ chūök chamông im tötlöök, sökhak pöri nö köp ngam ṙĕh ngam tölöök.

¹³Tingöpö ön ngòh tötlöök tarik tö tanôichngen aṅ i minuh ò, öt kô-òngvah aṅ i munuh ò, öt kô-òngvah pöri ngam tölöök tö kanihngen.

¹⁴Ṙeū-eung im ṙòng nup ṙô ngòh tarik nö tööḵngen tö tölöök, havan nö in ò inrē tölöök, havan nö in ò inrē nup la-en kuntī ò.

¹⁵I mat ngam tö kulō-ovö öp talöökö ò, hangihtöre pöri tö inlēnö ngòh tö akaha tarik.

¹⁶Iṙūö akahaiṙen an ngam inkihten tö ngòh tö kulō-ovö, öt kūöngenre pöri tö akaha tarik tö inchököre.

¹⁷Ngòh tö kô-òṙô ameūkö tökô-en, ṙô töminyôny pöri ngam samūöcha.

¹⁸Hĕng tak ap umuh tökësô sā sanët tö saphötvökūö, kētö lanööken vah pöri ngam litāk tö akaha.

¹⁹Örheūheu nö köp nup minuh tökô-en töng rahëchtaṙen pöri litāk töminyôny-aṅ.

²⁰Yip mahalēnlö tötlöök aṅhav ellōn tö inchīlö, ṙāmölōn pöri cha-a yip mahalēnlö tölöök.

²¹Öt fukhu tölöök tö tö chōich, tööḵngen pöri ngam tötlöök tö kanihngen.

²²Sin-òṅkkūö ngam Mā Tēv nup minuh töminyôny-aṅ, kumchiklōn ò pöri yip tö kô-en inlahen.

²³Hanyatngö mikah re ön ngòh tö akaha tarik, ahangnyö kumlō-ov re pöri vē tö kulō-ovö.

²⁴Hayöng an min ngam kël ngòh tö pētngen, kētuṙen pöri min ngam tö ṙāhata nö i tökalēḵ la-en.

²⁵Langanhutī an tö ò ngam pinṙūtölōn ngòh tarik, haṙamlōn ò pöri öp tölöök ṙô.

²⁶Kē-ĕngre an ngam tölöök tarik nö ṙā-ang i tölöök, ngam talöökö ngòh tötlöök pöri hachōḵngen cha nö lō-ongkūö.

²⁷Öt pô-òvö ön min ngòh töṙāhata tarik, teūngen pöri min tö tö pōiṙāi ngòh töpētngen tarik.

²⁸Nômö an ngam kanröönö lanöökö, löö im kinpaha pöri ngam tövaich talöökö.