Read Car_Nicobarese INCHŌḴ-OṘÔ 14 Bible Online

INCHŌḴ-OṘÔ 14 - Car_Nicobarese bible

INCHŌḴ-OṘÔ 14

¹Mānlö patī an ngam mikah, aṅtī tö kël re pöri ngam kumlō-ov nö chiṙusten e.

²Pa-ekūö an tö ngam Mā Tēv ngam lamök i tö chiplö, öt chumkūöṙen pöri tö ò ngam tö chavīṙa talöökö.

³Fanòh uk ò an ngam ṙô ngòh tökulō-ovö, aṅten cha pöri nup minuh tö akaha.

⁴I chūök tö rö-övö kōiny nuā, rö-övö sāiny; yih pöri nö pōyen ṙòng sāiny lökten i kumlēḵ kōiny nuā.

⁵Öt minyôny-aṅ ön ngòh tökô-en ameū-aṅ, uhômnyö minyôiny-aṅ pöri ngòh samūöcha.

⁶Chök alaha ön ngòh tö mināich nö chöh mikah, lööṙen pöri ngam inkaha nö i ngòh tarik tö akaha elmat.

⁷Ṙā-angre i kūö tökulō-ovö, tön rö-ö man umuh kôtökūö tö ṙô mikah.

⁸Ngam mikah tö akaha tarik chöhlö el talöökö ò, inchīlö pöri ngam kumlō-ov tökulō-ovö.

⁹Ahūöngö tötlöök an ngam Tēv, im neūkölōn ò pöri ngam tö chiplö nö ṙāmölōn.

¹⁰Akahalōn an ngam ellōn tö miṙivlōn re, öt nôlta inrē aṅ tahëng i ṙanāmölōn e.

¹¹Payāyi öp min patī ngòh tötlöök, kôlòṙen pöri min öp rūkui ngòh töchiplö.

¹²Talöökö öp umuh tö huveū tölōn öp tarik, kinpaha pöri öp tölngökūö e.

¹³Pòrô nö ip nīölö ūngö ngam ellōn, miṙivlōn inrē tölngö ngam ṙanāmölōn.

¹⁴Tööḵngen ön min ngòh tötlöök tarik tö ṙòng nup talöököre, ngòh tölöök tarik inrē tö ṙòng nup la-en re.

¹⁵Ṙātö ellōn re ön ngòh yāich i tökeuheūttöre ngëichkö talöökö re pöri ngam tö akaha.

¹⁶Ṙēmen ngòh tö-akaha tarik havööngökūö re inrē tö ngam tötlöök, ngòh tö kulō-ovö pöri kavalngö sinôtöre öt chumkūöṙen inrē.

¹⁷Kulō-ovṙen ön ngòh tarik tö ka-eūyö tanānyö, tö möi pöri ngòh tarik tö akahaṙa.

¹⁸Teūngen ön ngòh yāich tö kumlō-ovö, sumpīövö pöri ngòh tö akaha tö mikah.

¹⁹Sōnngöre tötlöök nö i kūö tölöök, ngam tötlöök i kūö inkūp ngam tölöök.

²⁰Öt hanghuṙen ön ngòh yāich tö holre, pōyen hol pöri ngòh tökôlò.

²¹Ngòh tö mināich tö holre tököölö fālen, tö ṙāmölōn pöri ngòh tö aheūkölōn tö yāich.

²²Röh yip nö vāich vamī-il tötlöök? Höngökūö pöri yip vamī tölöök tö hināngö chöngö kanô-en inrē.

²³I taṙòkhöre la-en nup kanôlò, ngam töng ṙô pöri tī-iv tö neūkö.

²⁴Ngam mikah an sapīöv ngòh tö akahaṙa, kumlō-ovö pöri aneūmö tökulō-vö.

²⁵Hayööken nômö an ngam tökô-en ameū-a, ngam tö minyôny-aṅ pöri kamë-anga.

²⁶Kiröng an ngam inyönglen ing tö pa-ekūö tö ngam Mā Tēv, chūöku innyatlö inrē min yip kūön ò.

²⁷Löklö nômö an ngam pinhë-eṅkūö tö ngam Mā Tēv, in e öi kôḵ hakūönngö tinngöp kinpaha.

²⁸I ṙôken tarik ineū-eu an ngam rācha, pinyāingö kūön rācha pöri törö-ö tarik.

²⁹Ngòh töṙēmö tanānyö kiröngö mikah elmat, ngòh tö kurātö tanānyö pöri hapōilö kumlō-ovö.

³⁰Kētö nômö alaha an ngam töṙēm ellōn, chahū-uitī pöri tö tangëḵ ngam tanānyö.

³¹Ngòh tamṙam yāich tarik maha-āichngen ngam Vamīlen ò, ameū an pöri anga-aṅ ngam tö aṙē-ĕvlōn tö yāich.

³²Sūkiyö an ngam tötlöök lökten tötlöök la-en re, kôtökūö pöri ngam tölöök tö innyatlö lökten i mikah ò.

³³Köp an ngam mikah nö ellōn tö akaha elmat tarik, hö-ö pöri angū-ö nö akahaiṙen nö ellōn tökulō-ovö.

³⁴Hapōilö pumnāmö tarik an ngam lanöökö, minṙēngö tarik pöri ngam tökööl.

³⁵Ngòh tarik alaha tö lēnötī aheukhuvö tö ngam rācha, fuk in ò pöri ngam lanīnö ò öp tö lā-evṙen tö sumrōngkūö.