Read Car_Nicobarese INCHŌḴ-OṘÔ 16 Bible Online

INCHŌḴ-OṘÔ 16 - Car_Nicobarese bible

INCHŌḴ-OṘÔ 16

¹Aṅ i tarik ngam tö halēni ellōn, aṅ im Mā Tēv pöri ngam sanapṙô litāk.

²Ṙòkhöre nup talöökö ngòh tarik nö het nö i mat ò, kalah lumngan ma-alaha pöri ngam Mā Tēv.

³Im Mā Tēv tī man tö la-enre, ngaich köp min nup halēnlö meh.

⁴Chööḵnyu tī an ngam Mā Tēv nö vī tökeuheūttöre, ngam tötlöök inrē ip sakāmö kanihngen.

⁵Sin-òṅkkūö ngam Mā Tēv an ngam töt akahaṙa; köpölōn, öt kiröönngöre an min nö öt sācha.

⁶Halāmö tökööl tö hinang chöngö kanô-en inrē, hakūönngö tölöök inrē ngam pinhë-eṅkūö ngam tarik tö ngam Mā Tēv.

⁷Yē nup talöökö ngam tarik nö ṙāmölōn tī tö ngam Mā Tēv, vīten ngam tökunyaha-elmat tö re anga-aṅ nö lām nö in Ò.

⁸Ĕhten öp tö rahëichyen nö holtö lanöökö tö tö pōyen masūl nö holtö michūḵṙen.

⁹Halēn talöökö re an ngam ellōn tarik, hachōḵ vanāngö ò pöri ngam Mā Tēv.

¹⁰I minuh rācha nup tö vīhötvö chöngö, öt köölö fālen öp elvāng ò i kinṙôka.

¹¹Aṅ im Mā Tēv öp tölöök kinlah lumngan; la-en ò nup el inyul tökalaha lumngan.

¹²Ngam la-en tötlöök sin-òṅkkūö nö i rācha, pò ngam kantēra nö ṙātu lökten i lanöökö.

¹³Kumchiklōn rācha nup minuh tölöök, hāngenlōn inrē anga-aṅ tö ò öp tö chīpö ṙô.

¹⁴Inhangkö kinpaha an ngam lanīnö rācha, ṙaptö e inrē ngòh tö akaha tarik.

¹⁵Nômö ap umuh i hanātökūö ngam rācha, sā taṙul öp neūkölōn ò inrē tökumtö kūö sūng kumṙah.

¹⁶Ĕhten an ngam kinë-eṅ mikah tö kinë-eṅ humlum; ngam intöllö kinë-eṅ mikah elmat ĕhten tö rupīö.

¹⁷Kānngöre an ngam tökiröng talöökö tö chiplö tö ngam tötlöök; ngòh lamak talöököre haköp nômöre.

¹⁸Urēhĕkūö pinlāngen an ngam inkeūlen nö kiröönngöre, urēhĕkūö fanukngö inrē ngam inkeūlen ellōn.

¹⁹Ĕhten an ngam yanāchö ellōn i yāich tö ngam minchööḵö pôḵ hol mahakeūlen re.

²⁰Ngòh mahangihtöre tö ngam ṙô kôlòṙen min, ṙāmölōn inrē anga-aṅ ngòh mahayönglen re nö im Mā Tēv.

²¹Tarik tö chanöhöv ellōn invëka ngam ellōn tö akaha, tölöök ṙô inrē ṙūölö mileūchen linīpö.

²²Löklö nômö an ngam mikah in ò ngam tö aṅhav-in tö e, chinökṙen pöri ngam kumlō-ovö nö i tö kulō-ov.

²³Öp ellōn tö akaha vīten ngam ṙô ò nö tö chip kinṙôka, ṙūöten tö mileūchen linīpö inrē nö i minuh ò.

²⁴Nup tölöök ṙô sā chūök hönī, pachāka nö ellōn lanööken alaha inrē.

²⁵Talöökö ap umuh tölöök tölōn tarik, kinpaha pöri öp tölngö ngam talöökö.

²⁶Lā-evṙen öp chūök neūkö ngam tarik nö in ò; i ṙūöhö ṙô ngam elvāng tö ò.

²⁷Vīken tötlöök ön ngòh tarik töt kanôluṙô, sā tö ngehngökūö tameūyö öp ṙô ò inrē.

²⁸Pirātngö linā-alkūö ngòh tölöök tarik, hiṙeūtkôre inrē nö haköhngen milālöre hol re.

²⁹Haṙöingö holre ön ngòh tö tainy tarik hachōḵngen ò inrē nö el öp talöökö tötlöök.

³⁰Ngòh mamumtö kūö re kamënyö nup tötlöök.

³¹Ineū-eu nun në pakūkui nö sapīöv; taneūngen an im nômö tölöök.

³²Anga-aṅ ngòh tö ṙēmö tanānyö ĕhten tö tökalēḵ, anga-aṅ inrē ngòh mahayöng ellōn re ĕhten tö ò öp kamë el panam.

³³Kavaltu an ngam kinlah taneūngen nö i ṙòng takeun, aṅ im Mā Tēv pöri nup chöngö.