Read Car_Nicobarese INCHŌḴ-OṘÔ 17 Bible Online

INCHŌḴ-OṘÔ 17 - Car_Nicobarese bible

INCHŌḴ-OṘÔ 17

¹Ĕhten ön ngih tönyô nyā-akūö nö holtö chanëven tö ngih patī tö tööḵlö tö tökiröng nyā-akūö nö holtö linā-alkūö.

²Ngòh tö akaha inlahen töhakövö hayöng kūön re min öp tö lā-evṙen tö sinrōngkūö, amīnu inrē nö holkūö yip mak-alahare.

³Chūök inṙöich rupīö tanīönyö, tö hūkūö tameūyö inrē i humlum, kalah ellōn inrē ngam Mā Tēv.

⁴Hangihtöre ön ngòh tötlöökö la-en nö i minuh tötlöök; ngòh töminyôny aṅ inrē hangihtöre nö i litāk vamī tötlēn.

⁵Ngòh mumnônngen yāich hayëḵngen ap vamī-i ò; anga-aṅ ngòh tö ṙamölōn tö öt kanôlò öt kiröönngöre min nö öt sācha.

⁶Sapīöv tököiny yin vē nyīö yōm, ineū-eu yip kūön inrē yip yöng cha.

⁷Tölöök ṙô öt tölöök nö i tö kulō-ovö; höichngen minyôny-aṅ ṙô nö i kūö rācha.

⁸Sā tömilūönö ihong an ngam ṙāi minyôny nö i mat ò öp kamëtö e; kôlòṙen anga-aṅ ip töng kū-ö ò nö kānngöre.

⁹Chamöh hanāngenlōn an ngòh ma-aṙē-ĕl fālen, anga-aṅ pöri ngam mahavannyö tö ngaichngen harēvngö holre.

¹⁰Chuh lā taṙeū öp vinëkö nö ellōn ngòh tarik tö akaha elmat mötlö tö tö hēngòng kinsōlö i ngòh tökulō-ovö.

¹¹Höng chöh inhôngen ön ngòh töt löök tarik, ngaich tīntu min öp töt milēḵ chanökhutī ma-ahānga nö lā-al ò.

¹²Yĕh hökngen öp tarik nö höngkūö öp tö ulāyi kūön kan për, höichngen anga-aṅ tö tökulō-ov nö i kumlō-ovre.

¹³Yē ngòh tarik nö haṙënngö tölöök tö tötlöök, öt kē-ĕng re min tötlöök nö ṙā-ang patī ò.

¹⁴Ngam ranehlö linā-alkūö sā tö löpnyukūö mak; lökten kē-ĕngre urēhĕkūö öp linā-alkūö.

¹⁵Ang-aṅ ngòh ṙamā-al tötlöök anga-aṅ inrē ngòh töt mahakôlò tölöök hĕngren achā-a nö sin-òṅkkūö ngam Mā Tēv.

¹⁶Kūö yòh ang ngòh tökulō-ovö nö aṅhav eltī tö ṙāi nö havah mikah, yē ò nö öt kuilōnuvö?

¹⁷Örheūhen ön ngòh hol nö hāngenlōn; fötnyu inrē mak-alaha nö i linā-alkūö.

¹⁸Kilēḵngôre ön ngòh tarik töt akahaṙa, ane inrē kētöre nö ṙënngô nö i kūö holre.

¹⁹Ngòh tö hāngenlōn tö tanôichngen hāngenlōn tö linā-alkūö; ngòh ṙamūhölkui inkūp re chöh pinlāngen.

²⁰Öt kôlòṙen ön ngòh tarik tökurôkö ellōn, fukngö inrē ngòh tö chōchö rōi litāk nö i öt kanôlò.

²¹Miṙīvlōn yöngre ön ngòh nyīö tökulō-ovö, öt ṙanāmulōn ön ngòh yöng ngòh tö kulō-ovö inrē.

²²Tölöök an nö lanë-en ngam ṙanāmö ellōn, nyôngötī pöri tö tangëḵ ngam miṙīvlōn.

²³Hō-o ṙāi minyôny-aṅ ön ngòh tötlöök tarik nö ṙeū-eung im elngòh nö hachōchngö talöökö kinṙôka tötmichūḵṙen.

²⁴Ngòh tö akaha elmat tarik hachip kūö re nö im mikah, ip tölngö ngih tumlat pöri nup mat ngòh tökulō-ovö.

²⁵Miṙīvngölōn yöngre ön ngòh nyīö tökulō-ovö miṙīvlōn ò inrē ngam kamyôḵnyen ò.

²⁶Ötlöök an angū-ö ngam kinë-eṅ ṙāi fālen nö i tölöök tarik; vaich an angū-ö finôhò mā tarik.

²⁷Tö akaha ön ngòh mam-iṅ ṙô re, tö akaha elmat inrē nö tarik ngòh tö ufōvö ellōn.

²⁸Pòrô ngòh tö kulō-ovö töng öt ṙô-òvö, ngaich tö akaha tö lōn; hē ò nö mumtökūö re, sā tö ṙēmen anga-aṅ.