Read Car_Nicobarese INCHŌḴ-OṘÔ 19 Bible Online

INCHŌḴ-OṘÔ 19 - Car_Nicobarese bible

INCHŌḴ-OṘÔ 19

¹Ĕhten ön ngòh yāich tarik ngòh lamök i mikah re, tö ngòh tarik ngòh töchōchô, tökulō-ovö inrē.

²Öt tölöök an nö in ngòh tarik nöng öt akahaṙa, anga-aṅ inrē ngòh tö kurātöröön vāchö talöökö.

³Yē öp kumlō-ov ngòh tarik nö kētö öp talöökö ò nö im öt kanôlò, tainy ngaich öp ellōn ò nö lā-alkūö ngam Mā Tēv.

⁴Pōyen hol ön ngih kanôlò tö tufömngöre, ṙā-ai pöri ngòh yāich tarik tö hol re.

⁵Öt kiröönngöre ön min ngòh samūöchköholre nö öt sācha, anga-aṅ inrē ngòh tö minyôny-aṅ öthō inrē nö öt kô-òngvah.

⁶Maṙôngö yip chamöh neūkölōn öp tarik tö chulöṙentī nö kē-ĕtī, ṙòkhöre inrē nö hol ngòh tarik kamëtö raneushö.

⁷Ṙòkhöre yip mak-alaha ngòh yāich nö surīkhen ò; höichngen yip hol ò nö ṙāngen ò nö marôvat nö kiröönngöre? Fachūken cha anga-aṅ tö ṙô re, hö-ö pöri nö īnu tö cha.

⁸Ngòh kamë mikah hāngenlōn töre; kôlòṙen min anga-aṅ ngòh mahaköp mikah elmat.

⁹Öt kiröönngöre ön min ngòh samūöchkö holre nö öt sācha, anga-aṅ inrē ngòh tö minyôny-aṅ palā-aiṙen min.

¹⁰Ötkô ön ngòh tö kulō-ovö nö i yöng i tanë-eṅ, höichngen ngòh kaitī nö hayöng kūön rācha.

¹¹Vītö tarik an ngam mikah nö ṙēmö tanānyö, ineū-eu ò an inrē angū-ö ngam töt nginëchkö fālen.

¹²Sā sinṙöpö tö lāyön öp lanīnö ngòh rācha, sā tacham pöri i kui kiyôp öp miṙēlōn ò.

¹³Pinlāngen yöng re ön ngòh tökulō-ov nyīö kikōnyö, sā tö aṙöka kumṙah inrē ngam linā-alkūö tö kikānö tö pīhövö.

¹⁴Löktökūö yöng në patī: kanôlò inrē nö amin, aṅ im Mā Tēv pöri ngòh tö akaha tö pīhövö kikānö.

¹⁵Lapātö tī an ngam ṙanāhata tö inṙôhò, aheuk min inrē nö kapaha re ngòh tö ṙāhata tarik.

¹⁶Aṅhatī ön tö nômöre ngòh mahaköp chöngö; kapah pöri min ngam tösōḵ tö ngam ṙô.

¹⁷Mahaṙūönghökūö ngam Mā Tēv an ngam tö aheūkölōn tö yāich, ngaich anga-aṅ min nö havantö öp tī ò nö in ò.

¹⁸Mikahlölōn ngam kūön re kikōnyö isaha öp nyanātö meh nö umuh; un ip finëlngö ò öp ellōn meh.

¹⁹Kētö sācha öp min tarik tö kiröngö lanīnö; pò meh yē meh ṙānyen ò, höng hēkhökūöre me-eṅ min ngatī.

²⁰Hangihtöre tö inlēnö hō-o inköptöre inrē, hòṅ meh teūngen tö mikah lā unôich.

²¹Pōyen nup tö halēnlöngö ellōn tarik, ngam chööḵnyö ngam Mā Tēv pöri min tököp.

²²Öp hinang chöngö öp tö hòṅ in ngòh tarik, ĕhten inrē ngòh yāich tarik tö ngòh tö minyôny-aṅ.

²³Chuh im nômö tī an ngam pinhë-eṅkūö tö ngam Mā Tēv; tööḵngen inrē ngam tö aṅhav-in tö e; ötlökö an min tö kanihngen.

²⁴Chiṙīmtö tīre ön ngòh tö ṙāhata nö el pingāṅl, öt rēhĕn inrē nö havanlö e nö elvāng re.

²⁵Foh ngam tö mināich ngaich haköpö e min ngam yāich tö akaha; vëkö ngam tarik tö akaha elmat, ngaich teūngen min anga-aṅ tö mikah.

²⁶Ngòh tö chökhuṙen tö yöng re tö kikōnyö luḵngö ngam yöng re inrē kikānö, kikōnyö an anga-aṅ nö kūön kamëtö sinrōngkūö miṙē-ĕv inrē.

²⁷Kūön chu, ṙā-angre i hināngö inköphöti në töng lanô-òṅkūö ṙā-ang i nup ṙô mikah.

²⁸Mahayëḵngen kinṙôka töt michūṙen ngam töt kanôluṙô vamë-eny matre, ngam elvāng tötlöök inrē, mīktö öt lanöökö.

²⁹Löö tö mināich an ngam öt inkôlò, ngam finôhò inrē i uk ngam tö kulō-ovö.