Read Car_Nicobarese INCHŌḴ-OṘÔ 2 Bible Online

INCHŌḴ-OṘÔ 2 - Car_Nicobarese bible

INCHŌḴ-OṘÔ 2

¹Kūön chu, yē meh kē në ṙô chu hachūökngö në chöngö chu inrē in meh nö töpōiṙāi,

²Vī ngam elnang meh nö hangihtöre tö mikah harôntö ellōn re inrē i mikah elmat;

³Hòṅ, yē meh havëkö öp lamātuhēt hachônglôre inrē tö mikah elmat,

⁴Yē meh chöhö e nö sā rupīö lukken e inrē nö sā tönyatngö töpōiṙāi chehen;

⁵Ngaich me-eṅ min akaha elmat tö pinhë-eṅkūö töm Mā Tēv kôtökūö inrē tö mikah aṅ im Tēv.

⁶Pòn kētö mikah ngam Mā Tēv; lökten elvāng ò nö yih inkaha mikah elmat inrē.

⁷Hachūökngö tölöök mikah an hinöngken töchiplô; lanaklö cha an yip lamök i hinëngö,

⁸Aṅtö kanröönö tötmichūṙen kinṙôka haköpkö talöökö yip töhet aṅ in ò.

⁹Ngaich me-eṅ min akaha elmat inrē tö lanöökö kinṙôka inrē töt michūṙen töṙong, tölöök kanröönö inrē;

¹⁰Pò ngam mikah min nö meuthöt nö ellōn meh kuchik min inrē nö ellōn meh ngam inkaha;

¹¹Aṅten meh an min ngam huneū-eu elmat; aṅten meh min ngam mikah elmat;

¹²Ṙānyen meh ṙā-ang i talöökö tötlöök, ṙā-ang i tarik töchōchöṙô.

¹³Yip ṙāmā-ang kanröönö tölöök nö lök el talöökö sinngūlö.

¹⁴Yip töṙāmölōn nö la-en tö tötlöök tökuchīken inrē nö i chanôchö tötlöök;

¹⁵Tarik tökurôkö kanröönö, yip tö chavīṙa talöökö inrē.

¹⁶Yöölen min me-eṅ tötayōla kikānö, tö nup tövai ṙô löknyö elvāng ò,

¹⁷Ngam ṙāmāngö hol inyālöre vaichngö inrē tö kinlēḵngô nö im Tēv;

¹⁸Pò öp patī ò nö chalipköti nö im kinpaha, kanröönö ò inrē nö i nup nyat;

¹⁹Öt havan yip chamuh in e öt rēhĕn cha-a nö teūngen tö kanröönö nômö.

²⁰Lökten man hòṅ lök el talöökö tarik tölöök haköp ngam kanröönö tölöök inrē.

²¹Pò yip töchiplö min nö iyöng im panam, köp inrē nö in e töhēngòng ellōn tarik;

²²Rökiṙen pöri öp tötlöök nö ṙā-ang im panam, teuklöngö inrē öp tömichūḵ chanökhuṙen nö ṙā-ang in e.