Read Car_Nicobarese INCHŌḴ-OṘÔ 20 Bible Online

INCHŌḴ-OṘÔ 20 - Car_Nicobarese bible

INCHŌḴ-OṘÔ 20

¹Mahayëḵngen ön ngih vāin, tinṙōllen ngih tökalēḵ ka-eūt; öp tö hachō-oiṙen tö e inrē öt akaha.

²Sā sinṙöpö tö lāyön öp pinhë-eṅkūö tö lanīnö rācha; chūhu nômö ön ngòh maharunnyö tanānyö ò.

³Ineū-eu ngòh tarik an ngam ṙinūöhöng re tö linā-alkūö lā-alkūö re pöri vē tö kulō-ovö.

⁴Ngòh tö ṙāhata öt kuköhlö tumlat hē el ilūöi; chöh anga-aṅ hē el kanöinyông, ngaich öt taneūnguṙen.

⁵Sā tö aṙū mak öp chööḵnyö nö ellōn ngòh tarik, tūöklö e pöri ngòh tarik tö akaha elmat.

⁶Ahangköre ngòh tarik nö hamang chöngö, chīö pöri tökô nö kôtökūö tö tarik tökô-en

⁷Lök i mikahre ön ngòh tölöök tarik tökôlò yip kūön ò unôichrit ò.

⁸Hĕng tak öp rācha amūichhak nö el kantēra inkaha fālen pitōngngö tötlöök nö aṅtī tö matre.

⁹Chiāp tökô nö ngö ṙô, Ngaich chin vī ellōn re nö het; het chin ngaich öt īnu tö tökööl?

¹⁰Ṙōlkangen kinlah lumngan ṙōlkangen kinlah nyanūmö inrē hĕngren nyöre nö sin-òṅkkūö ngam Mā Tēv.

¹¹Pòrô ngòh nyīö ngaich i nup la-en ò nö mikahtökūö tö re, yĕn töhet öp la-en ò töhet chip inrē.

¹²Ngam elnang hamang ngam mat inrē mameuk, vahī ngam Mā Tēv nyöre anū-ö.

¹³Un hāngenlōn tö inṙôhò, hòṅ meh min ötlöök im öt kanôlò; milaklö matre man, ngaich pōyen nyā-aṅkūö min me-eṅ.

¹⁴Ötlöök an, ötlöök an, Ṙô ngam mahavah; hē ò pöri nö kiröönngöre, eū-eure anga-aṅ ngaich.

¹⁵Humlum ap umuh, pōyen inrē töpōiṙāi ihong; töpōiṙāi pöri nö yanöṅtö nup minuh mikah.

¹⁶Kē öp tökiröng inyut ngam tarik yē ò nö ṙënngô öp aṅ tahëng, haköp ngam kinlēḵngô ò inrē yē ò nö ṙënngô aṅ tahëng panam.

¹⁷Pachāka nyā-aṅkūö nö in ngòh tarik töteūngen tö e lökten i inchīlö, unôich pöri öp elvāng ò nö tööḵlö tö kiṙūöh.

¹⁸Haköpi nup töhalēnlöng tö inlēnö, kiyūngö ngih kinyūngö lökten ip töhuveū inchōkūö.

¹⁹Anga-aṅ ngòh kumröönngöre samöömkö ṙô hameuktö tö hayunka; lökten un hĕngtak hanôl töp tö ṙô tö kumlō-ov.

²⁰Yĕn hĕngtak ramūtngövah kikōnyö yöngre hēk kikānö yöngre, hanyāngi min öp ëāṅvö ò nö el tö sangūlö.

²¹Öp amin tö kurāten kinë-eṅ ik raneh ötkôlò min ip manā-aṅ.

²²Un ngö ṙô, Tī tö tötlöök chin min havāhal; hökkö ngam Mā Tēv, holṙen meh min anga-aṅ.

²³Töṙōlkangen kinlah lumngan sin-òṅkkūö ngam Mā Tēv öt löök inrē minyôny-aṅ kinlah lumngan.

²⁴Hachōtu vanāngö ngòh tarik tö ngam Mā Tēv; sitih kanô-òṅ ang ngòh tarik nö akah talöökö ò?

²⁵Tinngöp ngòh tarik an yĕn ka-eūyö ṙô nö ngö, Töhet an, nöng unôich inrē tö ngam tö chūöku kinlēḵngôre nö fē-ĕlre.

²⁶Pitōngngö tötlöök ön ngòh tö akaha rācha, haröltö kui cha inrē tö kalröön inröl.

²⁷Ëāṅvö ngam Mā Tēv an ngam ma-alaha ngam tarik, chök nup lamā tuhēt ngam alaha ò.

²⁸Haköp ngam rācha an ngam hinang chöngö kanô-en ṙapka inrē ngam kantēra ò tö lanöökö.

²⁹Ineū-eu yip ṙāl tarik an ngam kumlēḵ cha vanāyö tö köiny tarik pöri ngam pakūkui cha.

³⁰Hetngö tī tö tötlöök nup kinsōlö tö kônyitī tö vah; hëtö tī nup finôhò töp lā tuhēt alaha.