Read Car_Nicobarese INCHŌḴ-OṘÔ 21 Bible Online

INCHŌḴ-OṘÔ 21 - Car_Nicobarese bible

INCHŌḴ-OṘÔ 21

¹Töhëm an nö mak ngam ellōn ngam rācha eltī ngam Mā Tēv; havēngökūö e an i kū-ö lōn ò.

²Töchip ön ngih talöökö ngòh tarik nö i mat ò, kalah lumngan ellōn ò pöri ngam Mā Tēv.

³Tölöök vahīṙen öt michūḵṙen kinṙôka inrē mötlö hinô-òṅ tö ngam Mā Tēv tö tökētu.

⁴Tökësen mat mahakeūlenre ellōn inrē, tökööl, ëāṅvö ngam tötlöök.

⁵Öp töpētngen inlēnlö lamöö im tanë-eṅ, in cha pöri yip tö kurāten yih ngam yanāchö.

⁶Ngam kinë-eṅ kanôlò lökten litāk töminyôny-aṅ tö heuingö an hanusngö tinngöp kinpaha inrē.

⁷Ngam chanökhuṙen aṅ i tötlöök chūhutī min tö cha, pò cha nö sōḵ nö la-evṙen tö tölöök.

⁸Tö kuròk ön ngam talöökö tö fāluṙen, tö chip pöri ngam inlahen töhet.

⁹Ĕhten ön ngam inyöngö sinkeukngö i kui patī tö ngam hinòltöṙah kikānö lamā-alkūö el patī.

¹⁰Lōntö tötlöök ngam nômö ngòh tötlöök; i kūö ò öp hol ò nö öt kôtökūö tö miṙēlōn.

¹¹Yē ngòh tö mināich nö sācha, akaha ngaich ngam yāich; yĕn haköptu tö akaha tarik, teūngen anga-aṅ tö mikah.

¹²Ngëichkö patī ngam tötlöök ngam tölöök; fukngö ngam tötlöök nö i pinlāngen.

¹³Ngòh tumlupngö elnang re tö ṙô yāich nö peuiny, peuiny min anga-aṅ ngaich öt hāngö ṙô.

¹⁴Ngam tö ulāitu raneushö lakngö tanānyö; ngih elngòh ṙāi minyôny-aṅ inrē, lakngö tökalēḵ lanīnö.

¹⁵Yĕn kēkaṙen töt michūḵṙen kinṙôka, ṙanāmölōn tī angū-ö tö tölöök, nganāngö tötlöökö la-en pöri.

¹⁶Ngòh tarik tö karööna nö ṙā-ang talöökö mikah heūheure min el manūlö yip tö kapah.

¹⁷Tökôlò ön min nö tarik ngòh töhāngenlōn tö minyam; ötkôlò ön min tö chehen ngòh töhāngenlōn tö ka-eūt tavī-i inrē.

¹⁸Ṙāi tarik ön ngòh tötlöök nö i ngòh tölöök ngòh tötkô-en inrē nö im töchiplö.

¹⁹Ĕhten inyöngö el tönyaṅlnyi panam tö inyöngö in ngòh kikānö lamā-alkūö töng takākaṙô inrē.

²⁰Köp tö töpōi ṙāi chehen nö elyöngö ngòh tö akaha, ngeūktö u pöri tö kulō-ov tarik.

²¹Ngòh famchūrit lanöökö neūkölōn inrē kôtökūö min tö nômö ineū-eu inrē.

²²Ngòh tö akaha tarik reunglö nö el panam tökalēḵ ngaich tiṙölngö ngam töngëḵ chūök inyönglen cha.

²³Ngòh mahaköp elvāng re litākre inrē köptī tö re nö la-uk kanihngen.

²⁴Mināich, Minë-eny ngam mahakeūlen re tarik tökësen tölā-evṙen tö tökësen inkeūlen.

²⁵Öp lōn ngòh tö ṙāhata tarik fëlngen ò pò minë kël ò nö sōḵ nö la-evṙen.

²⁶Yikhanga ngòh tötlöök tarik irô-òtö sakāmö, kē-ĕti pöri ngòh tölöök öt ma-inngenre.

²⁷Sin-òṅkkūö an ngam tökētu tö ngam tötlöök; höichngen yē ò nö kētö e nö holtö tötlöök lōn re.

²⁸Ngòh samūöchkö holre ötkôlò min, öp ṙô ngòh hamang pöri tarik köp min.

²⁹Hangëkūöre ngòh tötlöök tarik, ngëichkö talöököre pöri öp tö chiplen tarik.

³⁰Hö-ö mikah, hö-ö mikah elmat, hö-ö inlēnö, nö kôḵ nö lā-al ngam Mā Tēv.

³¹Halēnö an ngam kōra ip sakāmö kinyūngö, aṅ im Mā Tēv pöri ngam minhôiṅyö.