Read Car_Nicobarese INCHŌḴ-OṘÔ 22 Bible Online

INCHŌḴ-OṘÔ 22 - Car_Nicobarese bible

INCHŌḴ-OṘÔ 22

¹Hòṅ atöllöng tölöök minë-eny nö mötlö tö töpōyen kanôlò, mötlö an inrē ngam neūkölōn tö rupīö hēk humlum.

²Meukkūö höö tökôlò yāich inrē; ngam Mā Tēv an vamī-i cha nö ṙòkhöre.

³Meuk kanihngen ngòh tö akaha tarik ngaich hayunngöre; iṙūöhöröön pöri töt akaha, ngaich kihten tökūö e.

⁴Raneushö inyāichngö pinhë-eṅkūö inrē tö ngam Mā Tēv nuk kanôlò, ineū-eu, nômö inrē.

⁵El talöökö ngòh töchōich nuk tö lòklöre kūö tinngöp inrē, anga-aṅ ngòh lamāköre köp min nö marôvat tö u.

⁶Haköptö ngam nyīö el talöökö ò nö kiröönngöre, ngaich yē ò nö köiny öthō min anga-aṅ nö ṙāngen e.

⁷Hayöng yāich ngòh tökôlò, ngòh mahaṙūöng inrē töhakövö tö ngam tö haṙūönghukūö.

⁸Angā-aṅ ngòh tameūchtö inkaha fālen tö michūḵṙen uvòhlö kanihngen min, ötteunglen min inrē öp fanòh aṅ i tanānyö ò.

⁹Ngòh tö aṅhav elmat tö mineukṙen kôlò min, pò ò nö holkūö tö yāich tö nyā-akūö re.

¹⁰Ahōnyö ngam tö mināich, ngaich kiröönngöre min ngam linā-alkūö, ṙātöre min inrē linā-alkūö ötlinëkô inrē.

¹¹Ngòh töhāngenlōn tö töhet ellōn, öp tö vāyö ṙô inrē nö ṙô-òv, hol ngam rācha min anga-aṅ.

¹²Aṅtö mikah nun minë mat ngam Mā Tēv, kavalngö nup ṙô tötkô-en pöri anga-aṅ.

¹³Ngö ṙô an ngam töṙāhata, Lāyön ap amuh el kahôyö? Kapah chin min el talöökö!

¹⁴Anūlö tö aṙū öp elvāng ngòh tö tayōla kikānö; fuk ël e min anga-aṅ öp chūök tanānyö ngam Mā Tēv.

¹⁵Nyëklöre ap kumlō-ov nö ellōn ngòh nyīö, ahōnyen e pöri nö ṙā-ang in ò ngam fanòh inköp mikah.

¹⁶Ngòh tamṙam yāich nö ṙūölö kanôlò re, hēk kē-ĕti nö i tökôlò yih min nö im hanāten.

¹⁷Asītö elnang re, hang ṙô tö akaha inrē, kētö ellōn re inrē im mikah chu;

¹⁸Tön kumchikṙen an min yē meh haköpö u ellōn re, yē u nö ṙòkhöre nö lēn nö i minuh meh.

¹⁹Hòṅ ngam inyönglen meh nö im Mā Tēv, mikahtölōn meh chin ngaich tö u töngamuh, in meh takô.

²⁰Öl öich ngaich kūichtö nup tö lūöi anāi ṙô inlēnö mikah inrē,

²¹Inmeukhömat meh tö töchip tökô-en inrē, hòṅ meh kētö tökô-en inrē, hòṅ meh kētö tökô-en sanap ṙô in cha yip tamīnngen meh?

²²Un ulāingen yāich, tön yāich ana, hēk kirāchtö kui tökihngen i kūö inkūp;

²³Pò ngam Mā Tēv min nö vë-elkui cha ngaich öt hakôlò nômö cha, yip töt mahakôlò cha.

²⁴Un hanôl ngòh tötainy tarik, unrēhĕn kiröönngöre holröön tö līn tarik,

²⁵Hòṅ meh öt haköp nup talöökö ò ngaich vönngö me-eṅ el tinngöp.

²⁶Uh man in cha yip kamëtö kinlēḵngô, yip ṙënngô nö i hötṙeh.

²⁷Yē meh öt aṅhav-in tö kahëtöre, kūöyòh öng ngam chamam meh nö kē-ĕyö nö el katòh meh?

²⁸Un kē-ĕyö öp hötṙeh minkahngökūö panam ök tī yik yöng yīö.

²⁹Meuk tarik öm tö milichngen tī nö i vahīṙen? I kūö rācha ap min nö sökhaka; Öthō ap min nö sökhaka nö i kūö tönyatngö tarik.