Read Car_Nicobarese INCHŌḴ-OṘÔ 23 Bible Online

INCHŌḴ-OṘÔ 23 - Car_Nicobarese bible

INCHŌḴ-OṘÔ 23

¹Yē meh ūichngöre nyā holkūö mahayöng, ṙēmen ngëichngöre töp i kūö meh,

²Ṙatnyö likeun re man aṅtī tö surītö yē meh tarik töpōivat nyā-avkūö.

³Um kuilōnuvö tö nup tö kuchik in ò, tön nyā-aṅkūö nup nö inchīlö.

⁴Um harëtnyö elmat re öm hòṅ teūngen tö kanôlò; akaha sòk lākö e.

⁵Yē meh ngëichkö e, ngāichen angū-ö; pò e nöng lūk nöng kitūöngöre, sā matēṙö nö kiteū kū-ö tö el halīöngö.

⁶Un nyā nyā-aṅkūö tarik tö milip; un kuilōn tö tökuchik in ò;

⁷Tön sā öp tö hĕng tak an kamhuk nö ellōn re. Nyā man ka-eūt inrē! Ngö ṙô anga-aṅ tö meh; öt in meh pöri öp ellōn ò.

⁸Kuvavlö nup nyahātöre man min nyā-aṅkūö; mëichngö tölöök ṙô re inrē.

⁹Un hāngö ṙô ṙô-òv tö tökulō-ov, tön mināich an min tö mikah nup ṙô meh.

¹⁰Un kē-ĕyö öp hötṙeh minkahngökūö panam hēk un yôkhöt el taṙeū kūönyōich;

¹¹Tön tökalēḵ ap Ṙamānyen cha; lā-al meh ap min nö vë-elkui cha.

¹²Kētö ellōn re i inköphöti elnang meh inrē i ṙô mikah.

¹³Um ma-īṅtīre tö inköptö chöngö i nyīö; öthō ap min nö kapah, yē meh fōhan tö chōn.

¹⁴Yē meh fōhan tö chōn hayööken nômö ò min me-eṅ ṙā-ang el Anūlö.

¹⁵Kūön chu, yē öp ellōn meh nö akaha, ṙāmölōn min inrē öp ellōn chu.

¹⁶Ṙāmölōn min ngih nômö chu yē minë minuh meh nö chīpö ṙô nö ṙô-òv.

¹⁷Um kunyāha ellōn i tököölö fālen, i ṙūöhen pöri i pinhë-eṅkūö töm Mā Tēv i rô-òtö sakāmö.

¹⁸Öthō nö öt mū-unôchu umuh, öt rökiṙen ap min inrē maheūṅkkö meh.

¹⁹Kūön chu, hang; hôm akaha, hachōkūö ellōn re inrē el ngam talöökö.

²⁰Un hol kam-eūt, hēk un i tö pōivat nyamā-avkūö;

²¹Pò mihiyōi-aṅ tö pōivat inrē min nö yih im öt kanôlò, höng takācha inyut ön min ngòh tarik inrē tö tī ngam inṙòhlö.

²²Hang ṙô ngam yöng re kikōnyö ngam mahakūönten meh, un öt chumkūöṙen inrē töm yöng meh kikānö yē ò nö köiny.

²³Havah tökô-en, un inyīhiyö inrē; havah mikah, mikah elmat, inköphöti inrē.

²⁴Pōyen ṙanāmölōn ön min ngòh yöng tölöök; ngòh mahakūöntö tö-akaha nyīö kikōnyö ṙāmölōn min nö in ò.

²⁵Hökngen ngam kikōnyö yöng, kikānö yöng inrē nö ṙāmölōn, hökngen ò, ngam kamyônyen meh nö ṙāmölōn.

²⁶Kūön chu, kēḵ töp ellōn re in chu, hökngen minë mat meh inrē nö ngëichngö në talöökö chu.

²⁷Tö aṙū-uti anūlö ön ngòh mi-inyihköre kikānö; tö kamlah kanihngen.

²⁸Sā mū-ulāya an nö hulalhaka nö höng ṙūölö ṙôngö tötkô-en inrē nö i tarik.

²⁹Chīö tö īnu tö öt inkôlò? Chīap tö īnu tö miṙīvlōn? Chiap tö vahënyu? Chīap tö nyahavö nö tö turëṙö elmat?

³⁰Cha-a yip tö marô-òten nö i vāin, cha-a yip kumröönngöre nö katĕh vāin.

³¹Un hatīönka ngam vāin yĕn turë, yē e nö pök el kōp chaleūkköti inrē nö lā taṙeū.

³²Unôichngöre angū-ö sā pēch nö kap chökhukūö inrē nö sā pēch.

³³Parīönya elmat min me-eṅ ngaich, ṙô tö töchōich min ap ellōn meh inrē.

³⁴Ngaich me-eṅ min sā muhulalhak ellōn ngam mai, sā öp muhulalhaka nö el kui kanāmö.

³⁵Fōho chu yin, ṙô meh min hö-ö pöri chu-ö chök; fōho chu yin, öt akahaiṙen pöri chū-ö tö e, Ĕhē öich min aṅhen? Hòṅ chu chöh tahëng ka-eūtre.