Read Car_Nicobarese INCHŌḴ-OṘÔ 24 Bible Online

INCHŌḴ-OṘÔ 24 - Car_Nicobarese bible

INCHŌḴ-OṘÔ 24

¹Un kunyāha elmat tö tötlöök tarik, un rēhĕn nö in cha;

²Pò nup ellōn cha nö halēn chanökhuṙen, kakkö tötlēn inrē nup minuh cha.

³Mānlöngö patī lökten i mikah, köp angū-ö inrē lökten i mikah elmat;

⁴Lökten i mikah nup urôhò nö tööḵlö tö tö pōi ṙāi kanôlò inrē tavai.

⁵Mötlö kumlēḵ ngòh tö akaha tarik tö tökalēḵ tarik, ngòh tarik tö aṅhav-in tö mikah mötlö tö ngòh tö aṅhav-in tö kumlēḵ;

⁶Pòn lökten tö akaha inchōkūö öm kô kiyung öp kinyūngö meh, i ṙôken mahalēn inrē öp minhôiṅyö.

⁷Yahlö rô-òl chūök an ngam mikah nö i ngòh tökulō-ovö; i kūö inkūp anga-aṅ nö öt vā-anykūö re.

⁸Anga-aṅ ngòh mahalēnlö tötlöök la-en kaheūkö min nö vamī töchōich.

⁹Tökööl an ngam vinī-il kumlō-ov, sin-òṅkkūö tarik ngam tö mināich.

¹⁰Yē meh cheingö ip sakāmö öp lā-al meh, kūöṅnen öp kumlēḵ meh.

¹¹Kē-ĕ cha yip tökē-ĕ tö kinpaha; haköpö cha yip tö fukngö nö ip ṙamatnyö likeun.

¹²Yē meh ngö ṙô, yĕh meuk, öt akahakūö in tö e, öt meūkö e ang ngam kamlah lumngan ellōn? Öt akahalōn anga-aṅ ngam amahtö nômö yīö tö e, röh ang min nö havëkö e nö i tarik nö sā öp la-en ò?

¹³Kūön chu, nyā hönī, tön tölöök an, öp kintākö öp chūök hönī inrē nö pachāka kumchik.

¹⁴Akahalōn man tö ngam mikah nö ngatī ip nômö meh; yē meh kôtökūö tö e, mū-unôich min ap umuh, öt rökiṙen min inrē ap maheūkkö meh.

¹⁵Um sā tötlöök tarik hulahaka hayun öm i elyöngö tölöök un chökhuṙen tö patī ò;

¹⁶Pò ngòh tölöök tarik nö sat heuh nö fukngö, ngaich chōholre hēk; kavāli pöri min tötlöök tö pinlāngen.

¹⁷Un ṙāmölōn yĕn fukngö öp tö kunyaha elmat tö meh, un hökiṙen ap ellōn meh nö ṙāmölōn yē ò nö kavē-ĕre;

¹⁸Hòṅ öt meūkö e ngam Mā Tēv, ngaich kunyāhalōn, ngaich havööngökūö ngam tanānyöre nö ṙā-ang in ò.

¹⁹Un hakihten re tökūö tötlöököla-en, un kunyāhalōn inrē i tötlöök;

²⁰Tön rö-ö ön ngòh tötlöök tarik nö mū-unôichu; hanyāngi an min ngam eāṅvö ngòh tötlöök.

²¹Kūön chu, pa-ekūö töm Mā Tēv ngam rācha inrē, un öt hāngö chöngö nyöre cha-a;

²²Tön höng lūk öp min pinlāngen aṅ in cha nö chōholre, chiāp min tö akahalōn töp pinlāngen yamih nö ṙā-ang in cha nyöre?

²³Anū-ö min në inrē ṙô tö akaha, Tötlöök an ngam intölten i inkaha fālen.

²⁴Ngòh tö ngö ṙô tö ngam tötlöök, Öt fāluṙen man Öt lēkaṙen elnang min tö tarik, sa-òkhuvö tö pumnāmö tarik;

²⁵Achā-a pöri yip vamëkö tötlöök kumchīkulōn min, i kui cha min inrē ngam tölöök inkôlò.

²⁶Anga-aṅ ngòh tö chipô nö sapṙô hāmkūö minuh.

²⁷Halēn la-enre el kahôyö, lēnö tī tö nup el panô-òṅ meh; unôich ngaich mānlö patī re.

²⁸Um öt chööḵnyu vë-eny matre lā-al ngam holre, um hachīl inrē i minuh re.

²⁹Un ngö ṙô, Sā tī ò chin min chū-ö nö in chu; kētö nup tī ngam tarik chin min nö in chu.

³⁰Chööḵngö panô-òṅ ngam töṙahata chin taheui, ranghö panô-òṅ vāin öp töt akaha tarik;

³¹Yĕh meuk, ṙòkhöre nup tö chökhukūö nö marô-òlòng in e; keuheūtngöre ël ap tumlat tö tö chökhurōi, taṙöli inrē ap ihong kinlōngö e.

³²Meuk chū-ö ngaich fēken e inrē; ngëcha chū-ö kēḵinköptöre inrē.

³³Rahëchta mat haṙòh, rahëchta mat meuchngö matre, rahëchtatī kirup kël re heūheure,

³⁴Kôlò min ngaich öp yanāchö nö in meh sā mu-ulāya, öp hanāten inrē sā tarik tö aṅhavtī.