Read Car_Nicobarese INCHŌḴ-OṘÔ 25 Bible Online

INCHŌḴ-OṘÔ 25 - Car_Nicobarese bible

INCHŌḴ-OṘÔ 25

¹Inchōḵoṙô Sòlòmön nun në, në tö kūichiyö asā kinūichö yik tarik ök rācha Heskīā aṅ Yutā.

²Ineū-euṅ ngam Tēv an ngam innyathanga, ineū-euṅ rācha pöri chinöhö.

³Sā minë halīöngö nö marô-òl chūök, ngam tumlat inrē nö aṙū-uti, ngatī öp ellōn vē rācha nö töt chanöhen.

⁴Kēngö ngam yeich im rupīö, aṅhavtī an inrē ngam ramöm nö ip chūökṙenre;

⁵Kēngö ngam tötlöök ṙā-ang i kūö ngam rācha, ngaich köp min ngam kantēra ò im lanöökö.

⁶Uh man halāḵnyöre i kūö ngam rācha hēk sökhaka i chūök tökiröng;

⁷Pò e nö ĕhten yĕm tölöṙô, ṙūöhölre tā-ih ĕhten tö meh tumṙeūtu i kūö öp kūön rācha, Nup maheuṅk minë mat meh.

⁸Um ilöö kētu el chūök kinṙôka; sitih inlahen ṙöng öm min ip manā-aṅ, yē öp hol meh nö sumrōngngö kūö meh?

⁹Hakôtôre man ip holre töp fālen, ane inrē un hameuknyu öp hayunken tahëng;

¹⁰Hòṅ ò öp hamang ṙô meh nö öt sumrōngngö kūö meh, ngaich öt chanuhuvṙen öp tötlöök ineūkö meh.

¹¹Öp ṙô tölöökö kanaknyi sā öp ṙòng chōn i humlum nö chūök tö rupīö.

¹²Sā humlum kinlong hēk yanöṅtö humlum ngòh tö akaha vamë-a nö i elnang hamang.

¹³Sā öp tö-ufōv tacham tökënngöre hē el inmūlö ṙòng ngòh tökô-en ma-ahānga nö in cha yip tamīnngen ò, hangëṅlö ellōn yip yöngṙen re anga-aṅ.

¹⁴Sā në taṙul kuföt inrē töt kumṙahav röön ngòh tarik ameū raneushö nup töt kahëtö ò.

¹⁵Holtö manöinyö ngòh mahayöng nö vamë-eṅkūö, öp tötngëḵ litāk inrē lakölö tī min tö tangëḵ.

¹⁶Yē meh kôtökūö tö hönī, ip ṙôkvat re me-eṅ nyā-aṅ e hòṅ meh öt yaha ṙôkvat ngaich kuvavlö e.

¹⁷Uh man ṙöpö röön i patī ap holre, hòṅ ò nö öt uhā-en tö meh ngaich surīkhen meh.

¹⁸Ngòh tarik ngòh samūöichkö holre sā laneh aṅtī kumyung, hēk sanët, hēk chòk tökeut.

¹⁹Hayönglenre i töt kô-en tarik hē el kanihngen sā chanökö kanap hēk tö taleūsi röön.

²⁰Ngòh tumkökṙôre i töhaṙivlōn sā öp kamëngö kinṙum hē el laneūchö, sā töhīkīölhu vāin inrē nö i kūö vah.

²¹Yĕn kapahare öp tökunyaha elmat tö meh, kētö nyā-aṅ kūö ò; yē ò inrē nö haṙëhe nômö, kētö òk ò tö mak;

²²Pò meh min afônglö ta-ök tameūyö i kui ò, reushen meh an min ngam Mā Tēv.

²³Kumtö kumṙah an ngam kuföt lā kapā anë inrē öp litāk vamë-eng nang, tānyö mineūkö.

²⁴Ĕhten an ngam inyöngö i sinkeukngö i kui patī tö el patī holtöṙah kikānö lamā-alkūö.

²⁵Sā tö-ufov mak i töhaṙëhe nômö, ngatī öp tölöök inhānga ṙameū-eung tömarôvat panam.

²⁶Sā tö tilīnu ël mak hēk tömūmu mak ngòh tölöök tarik hamökngenre nö i kūö tötlöök.

²⁷Öt tölöök an ngam nyinā-aṅ höni öi pōivat, ngaich ṙālôre tö nöinyö.

²⁸Ngòh tarik tötkô nö hayöngöre sā ngih elpanam tö taṙēhĕyö ṙā-ayö ngaich nö ötkinlōngu.