Read Car_Nicobarese INCHŌḴ-OṘÔ 26 Bible Online

INCHŌḴ-OṘÔ 26 - Car_Nicobarese bible

INCHŌḴ-OṘÔ 26

¹Sā tacham tökënngöre hē inmūlöṙòng ngatī nö öt tölöök ngam ineū-eu tökulō-ov.

²Sā ngòh röchö nö kiteū, sā kinteūṙö likup inrē, öp rinūtngö vah töt chööḵnyu nö öt teungtöre.

³Fanòh i kōra inkāl elvāng i köttö, tinkung inrē i uk tökulō-ov.

⁴Un sapṙô tökulō-ov nö sā ngam kumlō-ov ò, hòṅ meh öt sā ò.

⁵Sapṙô ngam tökūlō-ov sā kumlō-ov ò hòṅ ò nö öt akaha tö lōnre.

⁶Ngòh samöömngö inhānga nö lökngö eltī tökulō-ov ramökngö kalröön re òk chanökhuṙen inrē.

⁷Sā kalröön tökaròk tarik, öp töng kalöla nöng öt kôlò, ngih inchō-oṙô elvāng tökulō-ov.

⁸Sā öp töhĕng tak nyamëk ihong chinvil anga-aṅ ngòh ameū tökulō-ov.

⁹Sā öp töchökhukūö eltī mihīyōi-aṅ öp inchō-oṙô elvāng tökulō-ov.

¹⁰Sā öp lumreny tökeuheūtngöre hanyahka anga-aṅ ngòh mahaṙāi tökulō-ov töng chamööḵ-anga hēk mihiyōi-aṅ.

¹¹Sā öp am mahavantöre i kuvavre ngòh tökulō-ov töng iṙūöhen nö i kumlō-ov.

¹²Meuk tarik öm ṙung tö-akaha tö lōn re? Maheūṅkku ön ngòh tökulō-ov tö ò anga-aṅ.

¹³Ngö ṙô ön ngòh töṙahata, Lāyön ap umuh el kanröönö!

¹⁴Takīöka ap inkūp nö i nup tinkīök re ngatī ngòh töṙahata nö el chaman re.

¹⁵Chiṙimtö tīre ön ngòh töṙāhata nö el pingāṅl cheiyö tī angū-ö tö ò nö hanyöplö kūöre.

¹⁶Tö-akaha ön ngòh töṙahata tö lōn re tö tösat tak tarik töhuveū-euṙô nö sapṙô.

¹⁷Anga-aṅ ngòh töng kamaptöre i linā-alkūö nö öt kanahngen ò sā kamë nang am töng chamööḵngöre.

¹⁸Sā tö katūöyaṙen tarik kamvaltö töhūkūö tameūyö chòk, kinpaha inrē.

¹⁹Öp tarik mahachīl holre nö ngö ṙô, Höng minôn chin!

²⁰Nyangngö an ngam tameūyö yĕn öt ngôhòvö; i chūök öp töhiṙeūtka ṙô inrē, ṙātöre linā-alkūö.

²¹Sā nup ta-ök nö ṙāchhöt töp tisum ngòh inrē tötameūyu kūö, ngatī tarik chöng lamā-alkūö nö tōttökūö linā-alkūö.

²²Sā tökuchik nyā-aṅkūö në ṙô töhiṙeūtka; meuthöt anū-ö keuheūtngöre chūök nö el alaha.

²³Sā lanūöp tölūöptu nö i ṙòng tanīöyö në töfaṙëcha minuh tö-aṅhav ellōn tö tötlöök.

²⁴Anga-aṅ ngòh tösumrīk, kavē-ĕre nö i munuh re hachūöklö michīl inrē nö ellōn re;

²⁵Yē ò nö aheūkölōn ṙô, un ṙātö ellōn re in ò, tön sat nup sin-òkkūö ellōn ò;

²⁶Pòrô nö hanyati öp sunrīkhö tö ò, hameuknyu min nö i tömaṙôngö öp öt lanöökö ò.

²⁷Ngòh amul anūlö fukngö min nö el e, havan an min ngam ihong nö in ò ngam pumlönö e.

²⁸Öp tö minyôiny-aṅ litāk kunyaha elmat tö yip pôre, öp elvāng inrē maharōilô vītö pinlāngen.