Read Car_Nicobarese INCHŌḴ-OṘÔ 27 Bible Online

INCHŌḴ-OṘÔ 27 - Car_Nicobarese bible

INCHŌḴ-OṘÔ 27

¹Un eū öp huṙöich, tön tö akahalōn man tö kumṙen öp sakāmö.

²Hökngen öp tahëng nö eū-eu meh, un öp elvāng meh; aṅ tahëng, un nup minuh meh.

³Langan ön ngòh ihong, langan inrē ngam kuyāyö, öp inrunnyö lanīnö tökulō-ov pöri langan tö u nyöre.

⁴Öt milēḵ ön ngih lanīnö, mihôiṅ tī pöri tanānyö; chīö pöri tökô nö sökhaka nö i kūö kumnyahlōn?

⁵Ĕhten töngāṅlnyi vinëkö tö töhanyāti hanāngenlōn.

⁶Tökô-en nup nyaha öp hol; pōitī chūök pöri hināmökūö tö tökunyaha elmat.

⁷Ngòh tölöökngen nö sa-òkkūö tö höni, i ngòh tökapahare pöri pachāka ngih tö-angūöṅvö.

⁸Sā chehechōn tölō-ongkūö tö fôngöre, ngòh tarik tölō-ongkūö tö patī re.

⁹Tavī-i, tinhus inrē ṙāmö ellōn tī, tikāchi pöri ngam ellōn tö kanihngen.

¹⁰Un ṙā-ayö hol meh, hol öp yöng meh inrē; um chuh patī öp mak-alaha re inrē hē sakāmö meh kihngen. Ĕhten öp hol tö röhta töp mak-alaha tömarôvat.

¹¹Kūön chu, akaha man, haṙamlōn chu inrē, hòṅ chu sapṙô ò öp mumṙēngen chu.

¹²Hayunngöre ön ngòh tarik tö-akaha yĕn meuk kanihngen; iṙūöhöröön pöri ngòh töt-akaha ngaich palā-aiṙen nö in e:

¹³Kē öp kinṙum öp tarik yē ò nö ṙënngô öp aṅ tahëng haköp öp kinlēḵngô ò inrē yē ò nö ṙënngô aṅ tahëng pumnāmö.

¹⁴Ngòh töpōitô nö hakôlò holre, ka-eūilökūö nö choholre tö peūheu, kaheuktu min nö ramūtngö vah.

¹⁵Ngih tö-iṙūöhen tö-aṙöka kumṙah sakāmö, hēngren tö ngòh kikānö lama-alkūö;

¹⁶ṙap ngam kikānö sā ṙināpö kuföt hēk kinṙapngö tire im tavī-i.

¹⁷Hakeut vët ön ngòh vët, hĕng tak inrē tarik hakeut ngam tahëng.

¹⁸Ngòh mahaṙūötken anychīrchōn nyā ṙòng ò min, anga-aṅ inrē ngòh amahtö yöngṙen re ineū-euvö min.

¹⁹Sā ngam kūö el mak nö hameuktö ngam kūö, ngatī öp ellōn tarik nö hameuktö ngam tarik.

²⁰Chūök Kupah Apatön inrē öt hētu nö tööḵngen, në mat tarik inrē öt hētu nö tööḵngen.

²¹Chūök vinī-i rupīö tanīöyö, töhūkūö tameūyö inrē chūök humlum, akaha ön ngòh tarik ip ṙô ò nö eū.

²²Kiṙöpngö tökulō-ovö el chūök sanông nö sōngö nö holre tö sāiny tösōngö, sön öp kumlō-ov ò nö öt hōḵ nö ṙāngen ò.

²³Akahalōn man tö inlahen nup pököre meh, chumkūöṙen inrē tö nup sīṅp meh;

²⁴Tön rö-ö kanôlò nö töng örheūheu; köp öng ṙung inrē ngih sapīöv rācha i tumköl chap?

²⁵Yĕn hö-öv nö ngaich kiyôp meūkö sanīöplö inrē tumfömngöre, hamūlö inrē nup kun chōn minë rôngö,

²⁶Meūken me-eṅ min tö hilāre tö në sīṅp, pököre inrē ṙāi taṙeū meh;

²⁷Kô-òngkūö me-eṅ min tö aṅ teh pököre, nya-aṅkūö yīö hĕng kinëm mineukṙen yip kūön yīö kikānö inrē.